Haissem Hassan compareció ante los medios de comunicación tres el últimu alcuentru del Real Oviedo pa analizar l'empat llográu pol equipu y la situación actual del conxuntu azul. El futbolista reconoció que'l resultáu dexó sensaciones negatives nel vestiariu, insistiendo en que l'equipu tien d'aspirar siempre a la victoria.
“Ye un golpe duru acabar empatando. Nun puedes salir d'ehí con otra cosa que la victoria. Ye daqué que se repite y tenemos que alcontrar la solución pa meyorar y xestionar meyor los partíos. Nunca un puntu ye un gran resultáu pa nós”, esplicó.
El xugador oviedista señaló que l'equipu volvió a vese penalizáu tres baxar llevemente la intensidá cuando tenía'l marcador a favor. “Cústanos caltener el resultáu y yá nos pasó enantes. Baxamos un poco'l pie y ponémonos atrás. En Segunda munches veces valíate pa ganar, pero en Primera hai que proponer daqué más. Siguir atacando ye la meyor solución”, amestó.
Hassan tamién destacó la evolución del equipu dende la llegada d'Almada al banquillu, subrayando un cambiu na actitú y na propuesta futbolística. “Con Almada hai meyora. Xugamos más agresivos, más arriba y proponemos más en cada partíu. Dende que llegó tamos muncho meyor”, afirmó.
Amás, valoró positivamente la so rellación col técnicu: “Fala muncho conmigo, sabe les mios cualidaes y intenta ayudame enantes y mientres los partíos. Pídeme encarar y ta mui pendiente de mí tanto en defensa como tácticamente”.
A pesar de la situación clasificatoria, el futbolista llanza un mensaxe de confianza. “Hai material pa creer. Les sensaciones son bones, anque nun dan puntos. Tenemos que sumar de tres en tres porque si non va ser bien difícil. Nun tamos tan lloñe y queden munchos partíos. Tenemos que creer; si nós nun creemos, va ser imposible”.
El xugador tamién fizo autocrítica colectiva sobre la xestión de los alcuentros. “Toos tenemos que meyorar los tiempos del partíu. Toos tenemos culpa. La meyor defensa ye un bon ataque y nun pue siguir pasando. Yá pasó en Xirona y ye imperdonable. Tenemos que tener más calma, quiciabes tamién por falta d'esperiencia, porque facemos lo más difícil, que ye adelantanos”.
Sobre'l próximu compromisu ante l'Atlético de Madrid, Hassan destacó la dificultá del rival, anque confía nel sofitu de la afición azul. “Ye un equipazu, con xugadores top a nivel mundial, pero cada partíu ye diferente. El Tartiere va tener muncha xente y eso ye una ventaxa pa nós. Podemos competir contra cualquiera”.