Volvía al banquín Sergio Egea y facíalo n’Almería, con cambiu de sistema y a la gueta d'una victoria, que llegó por merecimientu y trabayu d'un bon Real Oviedo que sigue metíu de llenu na llucha por un puestu de play off.
Na primer metá'l conxuntu oviedista llogró caltener el control total ensin qu'el Almería raspiara l’área de Champagne. La primera foi de Javi Hdez que remataba solu nel área a los cinco minutos. Paraba René la primer ocasión. Un centru de Saúl pasiábase pel área ensin rematador, y una bona xugada fabricada entre Jimmy, Bárcenas y Johannesson terminaba nuna mano clara nel área que'l colexáu nun dio como penalty.
Al empiezu de la segunda llegaba'l gol de Tejera. Un disparu dende la frontal que s'envelenaba al raspiar nún defensa y ponía el cero a unu pa los azules. Ibra tuvo'l segundu pero cabeció fora. Johannesson tuvo otra oportunidá clara con un centru al segundu palu que nun atinó a rematar. Cuando tocó aplicase en defensa tamién tiró l'equipu d'oficiu. Bon trabayu de Champagne y de tolos xugadores sobre'l campu, incluyíos los qu'entraron dende'l banquín, Mossa y Folch, pa da-y aire al equipu.
Tres puntos merecíos, col regresu a Asturies previstu pa mañana y el prósimu entrenamientu'l martes a les 10:30h n'El Requexón.
AST
