El Real Uviéu tuvo una tarde pa escaecer y llevó un castigu bien duru del Carlos Tartiere énte un Real Zaragoza al que-y salió too, y que llevó merecidamente los trés puntos del municipal uviedín.
Con un cambéu namás n’once titular uviedista, na entrada de Joselu por Toché, salía meyor el conxuntu mañu nel principiu de partíu. Les primeres llegaes foron d’ellos, y l’únicu averamientu uviedista, de Tejera con un disparu buscando’l segundu palu que marchó esviáu. Llegó entós el primer gol del Real Zaragoza, obra d’Álvaro Vázquez. Corría’l minutu quince de partíu, y el Real Uviéu nun reaccionó con contundencia. La más clara foi de Yoel Bárcenas, rematando n’área a pase de Saúl un balón que marchó esviáu.
Depués del descansu paecía que’l Real Uviéu camudaba la cara al partíu y diba a otra marcha. Entraba Ramón Folch en cuenta de Boateng nel mediu del prau, pero cuando meyor se taba atopando’l Real Uviéu llegaba’l segundu del conxuntu mañu. Verdasca ponía’l cero a dos y Anquela volvía mover bancu cola entrada de Toché en cuenta de Javi Muñoz, y Aarón en cuenta de Johannesson. Camudaba poco’l guión del partíu, les llegaes yeren uviedistes, pero los goles, del Real Zaragoza. Mossa probaba suerte con un remate dende la frontal del área que buscaba’l segundu palu pero marchaba esviáu. La más clara túvola Ramón Folch rematando de cabeza un córner, que s’afrellaba en palu, y que Christian Fernández nun acertaba a emburriar al refugue. Col Real Uviéu dafechu entornáu n’ataque llegaron los dos últimos goles y la sentencia del Zaragoza.
Una mala tarde del Real Uviéu, que foi despidíu con más apoyu y ciñu que nunca pola so afición, con cantaraes d’apoyu nos últimos minutos y desque acabó’l partíu. L’equipu va volver a entamar los entrenamientos mañana a les 10:00 n’El Requexón.
