El Real Uviéu quedó fuera de la Copa del Rei nel partíu xugáu esta tarde en Son Moix.
Anquela apostó por dellos cambeos nel once al respective de LaLiga, cola entrada de Champagne, Forlín, Carlos Martínez, Javi Hernández y la novedá d’Ibra en banda n’ataque. L’equipu tuvo los sos primeros averamientos con dos disparos de Boateng y Javi Hernández dende la frontal, y ensin llegaes del Mallorca. Na primer metá’l dominiu foi más uviedista y los averamientos tamién, anque ensin peligru claru porque faltaba’l remate. La lesión de Teyera dio-y entrada a Edu Cortina cuando nun s’algamare la media hora de partíu. El canteranu afíxose rápido al partíu, y la siguiente ocasión túvola Ibra nun remate forciáu n’área que marchó esviáu. La única del Mallorca atayóla Champagne, con un remate de Valcarce qu’acabó en manes del meta uviedista.
Tres del descansu ameyoró’l xuegu de los locales, y tamién les llegaes. Un centru d’Aarón que buscaba’l cabecéu de Toché n’área pequeña tornólu’l meta local, na oportunidá más clara de los azules. Respondía’l Mallorca col gol, nuna contra qu’acababa con Carlos Martínez en suelu y que Ferrán Giner remataba dende la esquierda, poniendo l’un a cero. A partir d’ende, y a pesar de los cambeos, poco más pudo facer el Real Uviéu, anque nun dexó d’intentalo, cayendo elimináu en segunda ronda de Copa.
L’equipu va entrenar mañana na ciudá deportiva del RCD Mallorca, y va volver pela tarde a Asturies.
