El Real Oviedo encaxó la segunda derrota de 2019 en Mallorca, nun partíu nel que los llocales anotaron al refugue d'un balón paráu na segunda metá.
Anquela camudó l'esquema, y tamién dellos xugadores. Con llinia de cuatro en defensa, Johannesson y Mossa quedaron nel banquín y Viti entró nel llateral. Volvió Folch y formó con Teyera y Javi Muñoz nel centru del campu. Omar na banda derecha y Toché en punta fueron les otres novedaes. Anquela buscó un cambiu pa tener más posesión de balón y na primer metá funcionó-y. Anque nun hubo disparos a puerta, el conxuntu oviedista defendióse con criteriu y nun-y concedió al rival. Tampoco nun llegó demasiao al área llocal pero tampoco lo fizo'l Mallorca, ensin ocasiones clares para nengunu de los dos equipos. L'Oviedo buscaba tener el balón per dientro y l'equipu llocal los espacios per fuera, y nesi bracéu llegábase al descansu.
Yá na segunda metá, el dominiu llocal aumentó. Vicente Moreno movió rápido'l banquín y’l Mallorca ganó en fondura. Apertó y marcó, col llanzamientu de dos córners siguíos y una falta. Al refugue, Estupiñan disparaba rasu y cruzáu, anotando l'unu a cero para los llocales. Anquela fizo un cambiu doble con entrada d’Ibra y Saúl Berjón, y pocu dempués Joselu. La más clara, al marxe d'un par de xugaes a balón paráu, túvola Saúl nun disparu qu'atrapó Manolo Reina.
Finalmente, derrota para l'equipu oviedista, que va tornar a los entrenamientos el martes a les 10:30h.
AST
