Ensin Tejera y Javi Muñoz, el principal protagonista na alliniación de Juan Antonio Anquela pa recibir al Deportivu de la Coruña yera Jimmy. Ensin afición en delles graes del Carlos Tartiere y con bien poco n'otres fasteres hasta'l minutu 12, los oviedistas apertaron n'ausencia de los suyos y énte los ánimos de los tres mil aficionaos gallegos que daben calor al equipu de Natxo González.
Salió fuerte'l Real Oviedo, y seriu dende'l primer minutu. Con dos avisos de Yoel Bárcenas, nel minutu 10 llegaba'l tantu oviedista, obra del panameñu. Un bon centru de Saúl dende la esquierda lu peñaba Joselu nel primer palu pa llegar Bárcenas y emburriar al fondu de la rede de cabeza na área pequena. Xubía'l gol al marcador p'allegría de l'afición carbayona qu'empezaba a ocupar les graes poco dempués. El guión del partíu siguió siendo'l mesmu y Folch goció de la ocasión más clara de la primer metá pa poner el dos a cero. Un balón en fondura que llegaba al segundu palu, en carrera del catalán, demasiao forzáu y remató fuera. Champagne unviaba a córner un disparu de Quique dende la frontera, y con él finaba la primer metá.
Al entamu de la segunda llegaron los meyores minutos del Dépor. Un pase en llongura dende la esquierda terminaba en gol de Quique, que remataba de primeres en carrera. Xubía l'empate al marcador, y’l Real Oviedo volvía dir por más. Calteniendo la seriedá defensiva, y combatiendo la posesión, Ibra salió dende'l banquín y Saúl probaba con un disparu dende la frontera qu'atayaba Dani Giménez. La más clara tuvola precisamente Berjón nún llanzamientu directu de falta, que lu sacó’l meta gallegu de la escuadra, yá nel tiempu añedíu.
Un empate qu'el Tartiere cellebró colos sos xugadores, por munchos más motivos que la resultancia, n'una de les meyores entraes de la temporada nel municipal uvieín.
