Tal día como güei, un 20 de xineru, nel añu 1946, el Real Oviedo calteníase como líder en solitariu de la máxima categoría del fútbol español al empatar nel Stadium Metropolitano frente al Atlético de Madrid, entós denomináu Atlético Aviación.
Llegaba'l Real Oviedo a esi partíu, correspondiente a la decimosexta xornada de Lliga, nel primer puestu de la tabla con un puntu d'aventaxa sobre'l Real Madrid y el Barcelona y dos puntos sobre l'Athletic (entós Atlético) de Bilbao y el Sevilla.
El Real Oviedo yera líder dende la xornada decimocuarta, na que s'había imponentu al Español de Barcelona por 1-2 nel estadiu de Sarriá. Na decimoquinta fecha, el conxuntu asturianu había calteníu'l primer puestu de la clasificación al ganar al Alcoyano por 3-2 nel Stadium de Buenavista.
Pa defender el lideratu nel Metropolitano, el Real Oviedo, entrenáu por Manolo Meana, presentó el siguiente once: Argila, Jugo, Penedo, Granda, Diestro, Sirio, Antón, Goyín, Cabido, Cuesta, Emilín. El partíu concluyó col resultáu de 2-2. Los goles del Real Oviedo foron marcaos por Goyín y Emilín.
El empate llográu pol equipu asturianu y los resultaos llograos polos sos perseguidores propiciaron que'l Real Oviedo continuara una selmana más liderando'l fútbol español.