Cola baxa de Saúl Berjón por sanción, Anquela allinió énte’l FC Barcelona B a Toché y Fabbrini como novedaes en punta.
L’equipu empezó’l partíu tratando de facese col control del balón, énte un filial blaugrana que tamién lluchó pola posesión. Ensin demasiaes ocasiones na primer parte, Diego Fabbrini tuvo la primera nun disparu que marchó esviáu. Alfonso intervieno pa unviar a córner un remate en gran xugada del equipu de Gerard López que salvó’l meta azul. Carlos Hernández remató, nel segundu palu, un centru dende la esquierda qu’aparó Ortola y llegaba, poco depués, la xugada polémica nun gol de Toché, anuláu por fuera de xuegu inexistente. A puntu del descansu, espulsaben a Juan Antonio Anquela y el Real Uviéu marchó con empate a cero al vestuariu.
Na segunda’l conxuntu azul foi amu y señor de les ocasiones de peligru, con llegaes de contino pero ensin definición. Primero Ramón Folch y depués Mossa tuvieron les más clares, pero nengún de los dos remates atopó portería. Johannesson y Toché diben protagonizar un remate caún que tornó la zaga blaugrana, y nin colos cambeos y la entrada de Linares, Yeboah y Viti foi abondo pa ver puerta. Aarón tuvo la postrera nun disparu rasu qu’atayó Ortola y que dexó ensin premiu al Real Uviéu, sumando un empate ensin goles.
L’equipu vuelve mañana a los entrenamientos, dende les 10:30 hores, n’El Requexón.
