El Real Oviedo nun sentenció, y pagólo nel descuentu. El conxuntu oviedista tenía prácticamente los tres puntos na mano cuando nel agregu un gol del CD Lugo retayó'l premiu en forma d'empate, frenando la racha positiva del conxuntu oviedista d’estos partíos caberos como local.
Anquela introdució dos cambios nel once, cola entrada de Javi Muñoz por Folch (sancionáu ) y Viti na banda derecha, con Johannesson nel carril. El Real Oviedo mandó de principiu a fin la primer parte, con control del balón y de les ocasiones, ensin pasar apuros en nengún momentu del primer tiempu. Avisó Viti con un primer remate que finó en córner, y dempués Bárcenas, nun mano a mano con Juan Carlos que terminó en parada del porteru gallegu. Otru remate de Carlos Hernández nel segundu palu tamién lu atayaba'l porteru llucense, y nel minutu 30 Teyera abría'l marcador con un disparu rasu, al refugue, que ponía l'un a cero nel marcador. Entá tendría una clara Joselu, rematando casi en boca de gol, pero volvía atopase con Juan Carlos.
Na segunda parte'l guión camudó y el Lugo foi atopándose más cómodu y faciéndose cola posesión de balón. Champagne espurrióse p'atayar primeru y dempués evitar el córner. Respondío Bárcenas con un remate rasu qu'atrapó Juan Carlos. Entraron los cambios dende'l banquín, con Ibra y Saúl primeru y Omar Ramos dempués. Túvola Carlos Hernández, con un cabezazu a saque de falta que coló alto a poques. Omar Ramos diba tener un mano a mano que nun yera a marcar, y llueu llegaba un paradón de Champagne, en llanzamientu directu de falta del Lugo, que forzaba'l córner. Y nel llanzamientu d'esquina, Vieira anotaba l'empate, yá nel agregu.
Finalmente un puntu que-y supo a poco al Real Oviedo, que torna a los entrenamientos el martes a les 10:30 hores n'El Requexón.
AST
