Primer partíu de 2021 para'l Real Oviedo, que recibía esti domingu al RCD Mallorca nel NMR Carlos Tartiere, con repartida de puntos a la fin de los 90 minutos.
Femenías; Juanjo Nieto, Bolaño, Arribas, Mossa; Viti, Javi Mier, Jimmy, Nahuel; Rodri y Blanco Leschuk fueron los escoyíos pol Cuco Ziganda para midise énte unu de los rivales más fuertes de la categoría, nun partíu
marcáu pola intensidá y les inclemencies del tiempu.
El choque, con dos partes estremaes, una pa cada equipu, empezó decantándose del llau del Mallorca, que salió meyor y aprovechó l'emburrie inicial pa golpiar primeru. Lago Junior y Sastre fueron los autores de los goles visitantes, aprovechando un despiste de la defensa oviedista y con un gran disparu dende fora de la área, respectivamente. Tres estos dos tantos, trescurríu'l minutu 30 de partíu, l'alcuentru camudó por completu, con un Real Oviedo que buscó la reacción y fízose col control de la pelota pa entamar a xenerar ocasiones sobro la portería defendida por Reina. Blanco Leschuk primeru, y Rodri dempués, con una ocasión qu'acabó nel poste de la meta insular, avisaron de les intenciones azules. Al filu del descansu, Javi Mier, nuna xugada ensayada de falta, retayó distancies nel marcador. Los carbayones allargaron les bones sensaciones hasta'l fin del primer actu.
Tres el pasu por vestuarios, el Real Oviedo siguió cola dinámica qu'atesoró mientres los primeres 45 minutos, perbién ordenáu y xenerando ocasiones al conxuntu balear. Los de Ziganda, ente un Mallorca que cerró les llínees, dispunxeron de les acciones más clares, consiguiendo l'empate nun balón paráu dende la esquina qu'Arribas mandó al fondu de la rede con una cabezada. Dispunxo de bonos minutos el conxuntu de la capital del
Principáu, que demostró les sos intenciones de dir a pol partíu hasta los instantes finales del mesmu.
Repartida de puntos pa empezar l'añu pa los de Ziganda, que demostraron que'l rindise nun ye xuna opción pa esti equipu. Los azules van volver al trabayu mañana pa preparar el choque del próximu miércoles de Copa ante'l Málaga en La Rosaleda.
