El Real Uviéu nun pudo despidise del 2018 con una victoria, que volvió merecer otra vez más, énte un Tartiere que tuvo col so equipu hasta’l final.
El conxuntu uviedista, llaráu de baxes y cola lesión d’Omar Ramos nel calentamientu y la entrada de Viti nel so sitiu n’once titular, nun pasó apuros en tol primer tiempu. El primer averamientu foi nun disparu de lloñe de Javi Hernández, que marchó esviáu. Champagne atrapaba ensin problemes nún de los remates del Málaga, a saque d’esquina. Munir sacó debaxo los palos la más clara de la primer metá, con un remate cruciáu de Viti, qu’al refugue Bárcenas tampoco nun yera quién a anotar con un bon espeye del conxuntu andaluz. Túvola Toché tamién nel primer palu, n’área pequeña, depués d’un bon centru de Javi Hernández dende la esquierda, pero nun atinó nel remate y tornó la defensa.
Na segunda metá siguió’l mesmu guión del partíu. Ensin pasar apuros, l’equipu d’Anquela buscaba’l gol y Christian Fernández remataba nel segundu palu un llanzamientu de falta qu’atrapó Munir. Con molesties, Toché foi sustituyíu por Steven, que fabricó con Johannesson y Viti una gran xugada qu’acabó afrellándose en poste, nel remate del de La Pola Llaviana, entrando en carrera n’área. El Málaga apertó nos compases finales, pero’l Real Uviéu defendió bien y salvó un puntu que-y dexó un tastu de boca amargosu pa despidir l’añu énte la so afición.
La vuelta a los entrenamientos ta prevista pal 2 de xineru, a les 10:30 hores n’El Requexón.
