El Real Uviéu encaxó una derrota doliosa en Riazor nún de los mayores desplazamientos de la so afición na temporada.
L’equipu, con dellos cambeos nel once en comparanza cola última xornada y la entrada d’Alanís y Christian en cuenta de Javi Hernández y Mossa, amás de Javi Muñoz nel mediu del prau, empezó bien plantáu l’alcuentru. Los primeros compases del partíu foron de dominiu uviedista, y la primer ocasión clara tamién, nun triple remate primero de Joselu y depués en dos refugues, que tornaron el porteru y la defensa. Bárcenas llanzaba una falta y volvía espeyar la zaga del conxuntu gallegu. Nel primer córner en contra llegaba’l gol, con remate de Domingo Duarte. A partir d’entós el Real Uviéu siguió col control del xuegu pero ensin demasiaes llegaes, hasta’l descansu.
Na segunda la más clara túvola otra vez Joselu cabeciando un llanzamientu de falta que marchó raspiando’l segundu palu. Probó suerte Bárcenas dende la frontal y el so disparu atayólu’l meta local. Poco depués marcaba’l Dépor el segundu, nuna contra que sentenciaba Quique. Y d’esi golpe nun se recompunxo’l Real Uviéu. Llegaba’l terceru, de Carlos Fernández, y el cuartu otra vez de Quique. Nin los cambeos fixeron reaccionar a los uviedistes, qu’encaxaron l’enfadu de la so afición a la fin del alcuentru.
El próximu entrenamientu va ser el llunes, a les 18:00 hores n’El Requexón.
