Ganar pa siguir en racha. El Real Oviedo midíase esti domingu al Mirandés en Anduva col enfotu de collechar un nuevu trunfu col que siguir esguilando puestos na clasificación. Los trés puntos énte la SD Eibar la pasada fin de selmana supunxeron una inyección de moral pa los uvieinos que llegaben a esta xornada númberu 17 de LaLiga Hypermotion nun gran estáu de forma. Pa esti alcuentru, el técnicu catalán, Luis Carrión allinió un once formáu por Leo Román, Lucas, Costas, Calvo, Abel Bretones, Luismi, Colombatto, Viti, Paulino, Seoane y Borja Bastón.
Los azules tuvieron la posesión y el control del balón nos primeros minutos del alcuentru anque nun terminaron de llegar con peligru sobro la meta rival. El Mirandés, pela so parte, defendió nel so campu y trataba de salir con peligru a la contra anque la primer acción clara d'ataque pa los de Lisci terminó en gol. Javi Martón remato una bona xugada combinativa y punxo, nel 26', el 1-0 nel marcador. Bastón, nel 31', trató de poner la igualada anque'l so remate a la media vuelta, tres un centru de Paulino, colóse esviáu de la meta defendida por Ramón Juan Ramírez. Los últimos minutos del primer periodu trescurrieron con igualdá ente los dos conxuntos y el choque coló con 1-0 al descansu.
Tres la continuación, Luis Carrión movió'l banquín y dio entrada a Sebas Moyano, de primeres, y a Alemao. El Real Oviedo trató de facer el tantu del empate cuanto antes anque'l combináu local nun-y pondría les coses nada fáciles. Los minutos siguíen pasando pero los azules nun terminaben de llegar con claridá sobro la meta rival. Nel 70', Camarasa y Romario Ibarra entraben en llugar de Luismi y Viti pa sumar más efectivos d'ataque en busca de la igualada.
L'emburrie carbayón tuvo'l so pagu y Bastón nel minutu 85 punxo les tables. Bon disparu del "9" dende dientro de la área pa poner el 1-1 nel lluminosu y pa faer cimblar a los oviedistas movíos hasta Anduva. El partíu llegaba a los últimos minutos anque la mala fortuna xugaría una mala pasada a los azules. Un córner a favor del Mirandés, nel 91', terminó en gol tres un rebote nel cuerpu de Dani Calvo qu'engañó por completu a Leo Román. Xarru d'agua frío nel descuentu pa los asturianos que lu intentaron hasta'l final pero que nun pudieron, finalmente, llevase nengún puntu de Miranda de Ebro.
Tres esta resultancia, el Real Oviedo pon fin a una racha de nueve partíos ensin conocer la derrota y yá piensa nel próximu compromisu ligueru énte l'Espanyol. La nueva cita pa los uvieinos va tener llugar el próximu vienres nel Carlos Tartiere a partir de les 20:30 hores.
