Sacavera de traxe de guerra para Cartagonova y tres puntos bien importantes en xuegu. Cambéu de sistema y d'homes, cola entrada de Javi Mier de nuevu nel once por detrás de Borja Bastón, y Sangalli y Borja Sánchez nes bandes. En frente un Cartaxena col ex oviedista Tejera nel so once titular.
Tres unos minutos iniciales de tantéu, y nun centru de Borja Sánchez dende la esquierda qu'esviaba un defensa, Luismi disparaba directu a puerta anotando'l cero a unu cuando nun s'algamaren los 10 minutos de partíu. Anque la posesión foi del Cartaxena, el conxuntu uvieista nun pasaba apuros en defensa. Foi nuna xugada de mala fortuna na que se decretó penalty por mano na área. Llanzó Rubén Castro y anotó l'empate antes del descansu.
Yá na segunda y tres un par d'acercamientos con peligru oviedista, resultaba espulsáu por colorada directa a Dauda por una dura falta sobre Costas. Llegaba poco dempués el doble cambéu uvieista, con entrada de Joni Montiel y Matheus Aiás. Yera'l mozu madrilanu'l que firmaba un auténticu golazu pela escuadra pa poner l'unu a dos. Poco dempués, colorada directa a Tejera tres revisión del VAR, por falta sobre Joni Montiel. Minutos finales con gol anuláu a Hugo Rama per fora de xuegu y muncha tensión nos minutos finales, pa sumar una victoria bien importante en Cartaxena.
