Hasta l’últimu minutu, diz Juan Antonio Anquela. Y nun foi nel postreru del descuentu, pero sí nel del tiempu reglamentariu cuando’l gol de Christian Fernández-y dio los trés puntos al conxuntu uviedista en Los Pajaritos.
El Real Uviéu repitió once, al respective del de la última xornada previa al parón navideñu. Esquema con defensa de trés y carriles, y el partíu púnxose bien llueu de cara. Javi Hernández cocinaba una gran xugada que firmaba con un bon gol p’abrir el marcador. Nun s’algamaren los cinco minutos de partíu. Al Numancia costába-y safase de la presión tan intensa cola que’l conxuntu uviedista empezó’l partíu, pero nunos pocos minutos llegaba con pegada a la meta uviedista y obligaba a Champagne a intervenir nuna bona parada, unviando a córner un disparu que buscaba la portería. Poco más xeneró’l Real Uviéu n’ataque, con unos minutos nos que’l xuegu rompió y los dos equipos vasculaben rápido de defensa a ataque. Champagne volvió intervenir y el conxuntu uviedista probó con un remate floxu de Javi Hernández que marchó demasiao cruciáu.
Tres del descansu, un gol tempraneru del conxuntu local ponía les tables en marcador y metía-y una marcha más al conxuntu d’Anquela. Respondía a los dos minutos Carlos Hernández con un testerazu a saque d’esquina de Tejera, volviendo poner en ventaya al Real Uviéu. Más minutos llocos, y respuesta del Numancia col empate, de botes de Diamanka, con un remate potente dende la frontal. Y vuelta a empezar. Joselu salía dende’l bancu y metía-y pólvora al ataque. Recuperáronse dellos balones en campu contrariu, pero nun s’acertó nos metros finales. Tiró Johannesson mui axustao y atrapó Juan Carlos. Joselu tuvo la suya, solu n’área, pero remató a les manes de Juan Carlos. Omar Ramos y Mossa daben refrescu nos últimos minutos y llegaba el gol. Facíalo nun córner, botáu por Tejera, peñáu por Mossa nel primer palu y enchufáu a gol de cabeza nel segundu palu por Christian Fernández. Llocura uviedista, trés puntos y victoria del equipu d’Anquela, depués de munches xornaes, lloñe del Tartiere.
