La sala de prensa del Carlos Tartiere acoyó esti mediudía la presentación oficial de Carlos Martínez como xugador del Real Uviéu.
Como cada presentación, el xugador tuvo acompañáu del responsable de Rellaciones Institucionales de la entidá, César Martín, quien-y dio la bienvenida, destacando que “ye un llateral derechu con una gran trayectoria. Provién de la Real, ye un xugador con un gran bagaxe. Agradecemos la so gana de sumase al proyectu, va ayudar enforma. Ye un futbolista de club, que vien con tola ilusión del mundu”.
Carlos Martínez empezó valorando cómo se dieron les negociaciones pa que se sumare al proyectu del Real Uviéu: “Desque me confirmaron que nun diba siguir abríase una etapa nueva, yera momentu de camudar d’aires. Tener la posibilidá de xugar cerca de casa, nun gran club y una ciudá como Uviéu, ye daqué que me fixo tar güei equí. Quería buscar daqué nuevo y la verdá ye que me fai muncha ilusión. Esta selmana falóse too, prestábame la idea de venir y poder tar nesti club ye daqué bien positivo. Vengo a dar too, apurrir esperiencia y sumar”.
Entrugáu sobre la so manera de xugar, el llateral asegura que “a lo llargo de la mio carrera camudé muncho. De primeres yera un xugador con munchu ímpetu, diba al choque, el fútbol d’enantes. De la que pasó’l tiempu fui amoldándome, camudando la mio manera de xugar, pero siempre con gana. Gústame acabar el partíu y tar convencíu de que lo di too. Amoldaréme a lo que me pida l’entrenador. Lluchar, lluchar y lluchar, eso nun va faltar”.
Sobre les sos conocencies del Real Uviéu, el navarru señala que “d’esti club conozo la so historia, tengo conocíos y faláronme perbién. Too foron coses positives y ye lo que buscaba. Toi nun bon equipu, que me va dar la oportunidá de volver disfrutar. Esti cúmulu de coses fai que tea equí”.
Tocante a si faló con Juan Antonio Anquela y qué conoz del xienense, Carlos Martínez afirma que “nun falé con él, pero la pretemporada ta al cayer. Cuando coincidamos vamos falar. Conózolu, sé que vive enforma los alcuentros y ye una cosa bona pa que toos teamos enganchaos. Tengo gana del llunes pa conocelu y a los compañeros”. Amás, sobre les sos sensaciones, el llateral destaca que “enfótome en mi y sé que puedo dar muncho. Quiero facer una bona pretemporada y tar a tope cuando empiece la lliga”.
P’acabar, preguntáu sobre la categoría y el nivel qu’adquier anguaño, con una Liga 1|2|3 cargada d’históricos, el defensor uviedista entiende que “la Segunda ta poniéndose bien interesante, sobre manera cola creación del play off. Anguaño hai equipos de nivel, históricos. Paezme que va ser una temporada bien llarga y tenemos qu’entrenar bien, facer una bona pretemporada y lluchar”, sentenció’l navarru.
AST
