ALLINIACIONES
REAL UVIÉU: Champagne; Carlos Martínez, Carlos Hdez., Christian Fdez., Mossa; Tejera, Javi Muñoz, Boateng; Johannesson (Sandoval, min 3), Saúl Berjón y Toché. Tamién xugaron: Forlín, Javi Hdez., Borja Sánchez, Edu Cortina, Steven y Ibra.
RC DEPORTIVO: Ortolá, David Simón (Gerard Valentín, min 64), Pablo Marí (Albentosa, min 78), Domingos (Bóveda, min 78), Dubarbier (Diego Caballo, min 64), Álex Bergantiños, Mosquera, Carles Gil, Krohn-Dehli (Edu Expósito, min 78), Quique González (Uxío, min 78) y Pedro Sánchez (Fede Cartabia, min 78).
Incidencies: XXX Troféu Villa de Foz. Guardóse un minutu de silenciu n'alcordanza d'Íñigo Tartiere.
Árbitru: Martínez Santos, del Colexu Gallegu.
Goles: 0-1 Domingos Duarte (min 60); 1-1 Ibra (min 70).
Nel partíu quiciás más completu de la pretemporada uviedista, el Real Uviéu proclamóse ganador na tanda de penaltis del Troféu XXX Villa de Foz, despidiéndose de los ensayos con mui bon sabor de boca énte'l RC Deportivo de la Coruña.
Anquela apostó por un once que desiguida se vio alteriáu pola lesión temprana de Johannesson. Retirábase'l canteranu mancáu cuando namás trescurrieren trés minutos de partíu, y el so sitiu na banda derecha ocupábalu Sandoval. Dominaba'l balón el Real Uviéu, y xugaba con criteriu, y con llegada. Un disparu potente de Saúl Berjón afrellóse en palu a los diez minutos de partíu, y el Dépor respondía con un disparu rasu qu'atrapaba Champagne ensin complicaciones. Tejera remataba dende la frontal depués d'una gran xugada combinativa del Real Uviéu, y el remate marchaba altu por poco. A puntu del descansu, una mano n'área deportivista asitiaba a Toché nos once metros pa tirar un penalti que diba aparar Ortolá. Col empate a cero marchaben los dos equipos a vestuarios.
Na segunda metá, Christian Fernández remataba alto de cabeza nun llanzamientu a balón paráu, y Mossa disparaba dende la esquierda, cruciao, buscando'l segundu palu. Marchaba fuera por poco. Llegó entós el gol del Dépor, nun centru llateral que Domingos Duarte atrapaba pa emburriar dende la derecha. Respondió Saúl Berjón con un xu potente, de falta, que volvía afrellase na escuadra. Ibra entraba en sustitución de Toché, y firmaba l'empate tres d'una gran xugada de Javi Muñoz, qu'acababa n'apertura a la derecha pa que Carlos Martínez punxere'l centru y Ibra fusilare de cabeza al fondu de la rede. Ameyoraba'l xuegu del Real Uviéu a pesar de qu'espulsaron a Edu Cortina, con colorada directa, nun castigu escesivu que dexaba al conxuntu uviedista con diez. Los minutos finales trescurriero ensin averamientos claros nes árees y llegó la tanda de penaltis.
Nella, Champagne convirtióse en protagonista atayando los dos primeros llanzamientos del Dépor. El Real Uviéu nun falló en néngún, y depués d'anotar Javi Muñoz, Borja Sánchez, Steven y Boateng, el Real Uviéu proclamábase campión nel so postrer ensayu de pretemporada.
