El Real Oviedo marchó ensin premiu, pero col arguyu igual d'El Molinón nun partíu condicionáu poles decisiones arbitrales. L'afición oviedista volvió ser exemplar, animando darréu y despidió a los suyos con aplausos.
Salió fuerte'l Sporting, pero'l Real Oviedo aguantó les primeres turniaes. El primer acercamientu foi de Bárcenas cabeciando fuera un centru de Saúl Berjón dende llinia de fondu. El control foi aumentando pa'l Real Oviedo, anque ensin fondura nun partíu costantemente atayáu poles faltes. Tejera tuvo un remate forzáu qu'atrapó Mariño y’l gol llocal llegó nuna xugada de mala fortuna oviedista.
Na segunda metá ameyoró'l papel del conxuntu oviedista, y a piques tuvo Bárcenas de gana-y la partida a la defensa nun bon centru de Mossa dende la izquierda. Movió banquín Anquela, dándo-y entrada a Ibra y Johannesson. Pitaba l'árbitru pocu dempués un penalty más que severu, y Champagne paraba'l disparu dende los once metros. El Real Oviedo volvía metese nel partíu y Anquela dába-y los postreros quince minutos a Toché. Emburriaben los oviedistas nel campu y na grada. Remataron Saúl y Toché, despeyaron la defensa y Mariño. Y nel noventa marcaba Ibra l'empate. L'árbitru dio gol y de siguío anulólu, dexando al Real Oviedo ensin un puntu merecíu.
L'equipu torna mañana a los entrenamientos a les 10:30h n'El Requexón.
AST
