El Real Oviedo cellebraba'l so 93 aniversariu, con dellos díes de retrasu. Enantes, fiesta nos esteriores del estadiu, y calentamientu cola camiseta conmemorativa. Namás un cambiu nel once titular en comparanza al de la última xornada, la entrada de Javi Hernández por Mossa nel carril izquierdu.
L'agua daba dalguna tregua nos primeros compases del partíu. Salió meyor el Real Oviedo, pero nun yera a llegar con claridá a la meta canaria. Un llanzamientu directu de falta de Bárcenas colaba alto. Pocu dempués, dellos
rebotes nel área terminaben col balón colándose a córner raspiando'l poste. A la media hora de partíu, marcaba Joselu y el gol nun xubía al marcador porque l'árbitru pitaba fuera de xuegu. El conxuntu oviedista nun pasaba apuru nengunu en defensa y Saúl acababa la primer parte con una bona xugada individual, autopase incluyíu en llínia de fondu, y disparu que finaba nel llateral de la rede colando a córner. Christian tenía la postrera, rematando a saque d'esquina, pero atayaba’l porteru del conxuntu canariu.
Na segunda metá, y col terrén de xuegu más afectáu pol agua enforma quenun paró en cuasi tol partíu, vinieron les llegaes con más peligru oviedista, pero tamién del equipu de Pepe Mel. Jimmy probaba en carrera con un disparu qu'atayaba Raúl. Saúl punxo a prueba otra vuelta al meta canariu con un llanzamientu dende la izquierda que buscaba la escuadra, y que Raúl tocó xusto para unvialu a córner. Ibra sustituyó a Joselu, y Champagne intervieno la primer vegada para unviar a córner un bon remate tres llanzamientu de córner. Toché entró al terrén de xuegu y retocóse l'esquema, cola salida de Carlos Martínez. Llegaba entós el gol de Ibra. Una bona xugada individual del ariete oviedista escoráu na banda izquierda paecía un centru buscando a Toché nel área, pero'l llanzamientu entraba directu a puerta y terminaba nel unu a cero. Paecía que la victoria quedábase en casa, cuando nel agregu un centru chut de Rafa Mir que diba directu a les manos de Nereo escapábase-y al porteru oviedista, con tola mala suerte, y finaba en gol.
Una fiesta que nun pudo ser completa, pero que terminó col Tartiere aplaudiendo a los xugadores de so, que van folgar la próxima selmana na xornada que tocaría’l partíu énte'l Reus.
El próximu entrenamientu va ser el llunes a les 10:30 hores n'El Requexón.
AST
