El entrenador del Real Oviedo, Guillermo Almada, compareció na sala de prensa tres la importantísima victoria del conxuntu azul ante'l Valencia CF nel Carlos Tartiere. En primer llugar, el míster destacó que "cuando tuvimos que defender fixémoslo con ñes y dientes, el trunfu ye mui xustu. Nun me presta defender cerca del área, nun me presta cambiar lo que tamos faciendo bien. Marcar el segundu gol yera lo que buscábemos, pero tres el gol anuláu y el desgastu quiximos protexenos de los centros llaeros y por eso pusimos a Dani Calvo. Fixémoslo bien, anque me presta más facelo llueñe del área rival".
"Les victories xeneren confianza, bon ambiente y reafírmente nel bonu que faes. Yera vital ganar güei pa xenerar too eso y acercanos al pelu. A nós namás quédannos finales", amestó.
Sobre los partíos que queden ante rivales direutos, Almada apuntó que "soi optimista por naturaleza, tamién porque veo a los xugadores entrenar. Namás podemos pensar nel Levante y dempués veremos. Hasta cuando xuguemos ante'l Madrid intentaremos ganar, esa tien de ser la nuestra mentalidá".
"Lo único que nun podemos facer ye dexar de pelear. La hinchada del Oviedo respáldanos y consiguen tresmitir muncho a los nuestros xugadores, oxalá esa comunón nun se pierda", detalló.
Por último y preguntáu por dellos nomes propios, "Costas tuvo un rendimientu altísimu con nós en tolos partíos. Tien esi carisma que xenera dientro del campu y güei volvió tener un rendimientu espectacular. Cuando'l equipu tien un bon funcionamientu, les individualidaes apaecen".
"Thiago y Ilic xugaron un partíu y tán medrando. Los xugadores necesiten confianza y son dos bonos futbolistes. Trátase de que nos lo pongan difícil pa asina tener más variantes nos partíos, bienveníos seyan. Fortalécennos como grupu", concluyó.