Conquistar El Sardineru. Con esa idea llegaba'l Real Oviedo a esta decimonovena xornada de LaLiga Hypermotion na que los azules víen les cares col Racing de Santander. El conxuntu carbayón, col sofitu de más de 1.200 oviedistas, llegaba a esti alcuentru col claru oxetivu de consiguir un nuevu trunfu col que siguir esguilando puestos na clasificación. Para ello, el técnicu catalán, Luis Carrión, allinió un once formáu por Leo Román, Lucas, Dani Calvo, Oier Luengo, Abel, Colombatto, Jimmy, Sebas Moyano, Seoane, Masca y Bastón.
Cuando apenes se cumpliera'l primer minutu de xuegu, Abel Bretones yá goció d'una ocasión perclara para facer el primeru. Sicasí, el so remate foi atayáu pol meta local. El bon arranque del Real Oviedo nun se frenó col pasu de los minutos y Colombatto, nel 17', ponía a los asturianos per delantre. 1-0 y llocura na grada visitante col tantu del arxentín. El Racing trató d'igualar el choque con una bona xugada de Arana pero Leo Román apaeció para, con una magnífica parada, caltener la portería a cero.
Magar la bon parada del "31", Peque, nel minutu 30 punxo'l 1-1 con un bon disparu rasu. El choque taba igualáu nuevamente anque el carbayones crecieron col pasu de los minutos hasta volver ponese per delantre nel marcador. Seoane primero anotó'l 1-2 pero'l so gol foi anuláu por falta previa, tres revisión del VAR, sobro Arana. Yá al filu del descansu, nel 44', Dani Calvo remató de cabeza un córner botáu por Colombatto pa volver poner a los uvieinos en ventaya.
Tres el pasu por vestuarios, los azules salieron al terrén de xuegu col enfotu de marcar el terceru pa empobinar el choque. Bastón tuvo dos bones ocasiones anque fueron invalidaes per fora de xuegu. L'ex oviedista Sangalli tuvo la más clara pa los locales nos primeros minutos del segundu periodu pero un Leo Román, intratable, negó-y el gol.
Viti entró al campu nel 61 en llugar de Colombatto y cola sustitución Seoane acompañó a Jimmy na medular. El Real Oviedo siguía per delantre nel lluminosu anque nel 78' Peque, de penalti, ponía l'empate. 2-2 y tou por decidir na recta final del partíu. Luis Carrión efectuó un triple cambéu nel 85 y Alemão, Yayo y Pomares ingresaron al campu.
Un erru en salida de balón del Racing a puntu tuvo de costar bien caru pero'l remate de Alemão foi repelido por un defensor. Darréu, Yayo mandaría'l balón a la cruceta con una bon cabezada tres un córner a favor. Sicasí, la resultancia nun se movía nin se movería no que restaba d'alcuentru. Empate final que fai que los carbayones sumen un puntu fora de casa y asítiense con 26 na clasificación.
