Dar un golpe enriba de la mesa para siguir mirando escontra riba. Con ese oxetivu llegaba'l Real Uviéu a Valladolid. Los uvieinos encaraben nesta ocasión un nuevu compromisu ligueru y fízolo cola moral peles nubes tres la so victoria, la pasada xornada, énte'l Burgos CF por 5-0. Pa esti alcuentru, col que se abrió la xornada númberu 28 de LaLiga Hypermotion, Luis Carrión allinió un once formáu por: Leo Román, Viti, Oier Lueno, Dani Calvo, Abel Bretones, Jimmy, Colombatto, Seoane, Dubasin, Sebas Moyano y Alemão.
El combináu vallisoletano entró meyor al alcuentru y tres dellos acercamientos sobro la meta de Leo Román llegó'l primeru. Monchu, nel minutu 18, nun perdonó énte la meta azul y punxo a los de Pezzolano per delantre. Los de la capital del Principáu quixeron reaccionar cuanto antes anque un bon Real Valladolid, que taba bien plantáu sobre'l terrén de xuegu, evitólo.
Colombatto, con un disparu de falta que s'envenenó, trató de sosprender a Masip anque'l porteru unvió'l balón a córner ensin munchos problemes. Yá na recta final de la primer parte, Alemão tuvo la más clara pa los de Carrión. El brasileñu remató a la madera un corner botáu por Colombatto al que Masip nun llegó y col que'l delanteru dexó al uvieísmu coles manos na cabeza. 1-0 y al túnel de vestuarios.
Tres la continuación, Sebas Moyano tuvo l'empate con un mano a mano antes Masip tres una gran asistencia de Dubasin. Sicasí, el disparu d'andaluz colóse esviáu. Tres esta gran ocasión del Real Oviedo llegaría, y por partida doble, el retruque del Real Valladolid. Amath aprovechó en menos de cinco minutos dos fallos de la zaga carbayona pa poner tierra pel mediu y dexar l'alcuentru vistu pa sentencia. 3-0 nel minutu 50 de partíu que dexaba a los carbayones tocaos.
Cazorla, Borja Bastón, Luismi y Masca entraron al campu en busca d'una solución anque'l partíu nun camudó. Los locales siguíen calteniendo la so ventaya ente que l'Uviéu nun llograba retayar distancies nin tampoco llegar con peligru sobro la meta de Masip.
Yá na recta final del choque, Luis Carrión dio entrada a Borja Sánchez en llugar de Colombatto. Dubasin, nel 89', remató esviáu dende la frontera de la área nel últimu acercamientu de los azules nun partíu nel que'l Real Valladolid foi meyor de principiu a fin.
Con esta derrota, el Real Uviéu remató esta xornada númberu 28 del campeonatu ligueru con 41 puntos y con ganes de tornar a la sienda de la victoria la próxima fin de selmana énte el Llevante UD nel Carlos Tartiere.
