Primer partíu del 2024 para'l Real Oviedo. El conxuntu azul arrincaba l'añu en casa, y la segunda vuelta de la competición, recibiendo nel Carlos Tartiere a la SD Amorebieta na xornada númberu 22 de la Lliga Hypermotion. Para esti alcuentru, el técnicu catalán, Luis Carrión, allinió un once formáu por Leo Román, Pomares, Jaime Vázquez, Lucas, Seoane, Colombatto, Viti, Sebas, Dubasin, Masca y Borja Bastón.
Les baxes y les ausencies obligó a Carrión a camudar de sistema anque llueu, el bien arranque de los locales, veríase compensáu col 1-0. Sebas Moyano, nel 2', remató de cabeza un bon centru de Viti para poner per delantre al combináu uvieín. Darréu, Bastón tuvo'l segundu pero'l so remate blocólu pola defensa de la SD Amorebieta. El pasu de los minutos fixo que los visitantes tuvieren más el control del balón y nel 32', Jauregi, aprovechó un balón muertu na área tres un corner pa poner l'empate.
Dubasin tamién tuvo una bona acción de peligru con un remate dende la frontera que se coló por pocu pero'l 1-1 sería finalmente la resultancia col que diríamos al descansu. Tres la reundación, el Real Oviedo trató de buscar el tantu de la victoria pero los acercamientos sobro la meta rival nun tuvieron premiu. El combináu vascu tamién acesmó la meta rival con un disparu que s'estrelló na madera anque Leo Román nun tuvo qu'intervenir por demás mientres los segundos 45 minutos.
Marco Esteban, Jimmy y Paulino de la Fuente fueron los cambeos realizaos por Carrión al descansu pa tratar de dar un pasó más escontra alantre. Darréu, yá nel minutu 80, Cazorla y Borja Sánchez ingresaben al terrén de xuegu con una ovación del Tartiere que nun dexó de creer nel trunfu. Los últimos minutos fueron de dominiu uvieín y Paulino, primero, y Bastón, darréu, raspiaron el segundu. El disparu del cántabru, dende fora de la área, colóse esviáu ente que'l capitán tuvo'l trunfu con un testerazu qu'atrapó Pablo Campos.
El Real Oviedo arrinca l'añu con un empate en casa que-y asitia en décima posición con 31 puntos a falta de que remate la xornada. L'equipu va tornar al trabayu mañana a partir de les 10:30 hores para empezar a preparar el so próximu compromisu ligueru énte'l Racing de Ferrol.
