Tornar a la sienda de la victoria. Con esa idea llegaba'l Real Oviedo al Carlos Tartiere. Los azules víen les cares col Llevante UD en perdiendo en Valladolid y collechar los tres puntos énte un rival directu yera'l principal oxetivu col que los uvieinos llegaben a esti alcuentru correspondiente a la xornada númberu 29 de LaLiga Hypermotion. Pal día de güei, el técnicu catalán, Luis Carrión, allinió un once formáu por Lleo Román, Viti, Oier Luengo, Dani Calvo, Abel Bretones, Luismi, Colombatto, Cazorla, Masca, Sebas Moyano y Borja Bastón.
La posesión del balón y la batuta del alcuentru foi pal Real Oviedo nunos primeros 45 minutos nos que les ocasiones clares de peligru arralecieron. El combináu granota, pela so parte, trataba de salir al contragolpe anque ensin demasiao peligru. Cumplida la primera media hora de partíu llegó la primer acción clara pa los de la capital del Principáu.
Nel minutu 33, Masca remató una bona recuperación en campu contrario anque'l so remate colóse percima del travesal. Darréu, nel 37', Dani Calvo tuvo'l primeru de cabeza, tres un córner llanzáu por Cazorla, pero'l so testerazu salió centráu y la meta visitante atrapó l'esféricu ensin problemes.
Cuando tou faía indicar qu'el 0-0 sería la resultancia col que diríamos al descansu llegó la peor noticia pa los nuesos. Adrián de la Fuente materializó una xugada ensayada de córner p'adelantrar al Llevante UD nel marcador y pa poner el 0-1. Xarru d'agua frío pal uvieísmu que vía como'l so equipu colar por detrás nel marcador al descansu.
Tres la continuación, el Real Oviedo salió con tou y nel 54´ Oier Luengo punxo'l tantu del empate. Los de Carrión fixeron lo más complicao y metiéronse de llenu nel partíu con tola segunda parte inda per delantre. Cinco minutos más tarde, Masca, con una cabezada tres una bona asistencia de Moyano, punxo'l 2-1 pa desamarrar la llocura nel Carlos Tartiere. L'uvieísmu vía cómo'l so equipu dába-y la vuelta al choque anque nel minutos 76, Carlos Álvarez punxo'l 2-2 na única llegada del conxuntu visitante na segunda metá.
Pese al tantu encaxáu, los carbayones nun dexaron de lluchar y buscar el tantu de la victoria. Nel 81´, Dani Calvo impúnxose percima de toos na área y remató dientro un córner botáu por Colombatto pa certificar el trunfu azul y dar trés puntos clave al Real Oviedo como que siguir suañando y engarrando pela zona alta de la clasificación.
