El Real Oviedo viaxaba nesta ocasión hasta tierres gallegues para midise al Racing de Ferrol na xornada númberu 23 de LaLiga Hypermotion. Los uvieinos, que veníen d'empatar énte la SD Amorebieta, queríen collechar una victoria bien importante nun campu complicao pa siguir averándose a los puestos altos de la clasificación. El técnicu del conxuntu azul recuperaba efectivos pal choque d'esti sábadu y por ello l'once escoyíu pol míster catalán foi'l formáu por: Leo Román, Viti, Dani Calvo, Oier Luengo, Abel Bretones, Colombatto, Jimmy, Sebas Moyano, Masca, Dubasin y Borja Bastón.
Los primeros minutos de partíu evidenciaron la importancia del partíu pa los carbayones y la mayor parte del xuegu desenvolvióse nel campu del Racing de Ferrol. Un Sebas Moyano bien activu protagonizó la mayoría de xugaes d'ataque pa los de la capital del Principáu anque ensin terminar d'atopar portería. Colombatto, nel 15', punxo n'apuros a la meta local con un disparu de falta qu'obligó a Cantero a estenar a córner.
El dominiu siguía siendo pal Real Oviedo, que nel minutu 20, tendría la más clara de la primer parte. Abel Bretones mandaba'l balón al poste tres un disparu potente dende la frontera que faía que'l más de mediu millar de oviedistes n'A Malata llevárense la manos a la cabeza. Yá en cantu del descansu, nel 40', Dani Calvo tendría otra clara acción de peligru pa poner el 0-1. Un córner botáu por Colombatto yera rematáu pol oscense pero la so cabezada colábase raspiando'l palu. Con esta última ocasión l'alcuentru foise al descansu y la sensación yera que los de Carrión merecíense'l primeru.
Tres la continuación, el cuadru de Parralo cutió primero. Un bon robu na salida de balón del Real Oviedo foi aprovecháu por Iker Losada pa bater a Leo Román y punxo´l 1-0 nel lluminosu. Los uvieinos punxéronse por baxo nel marcador anque nun tardaríen enforma en volver igualar les coses. Masca, nel minutu 57, remataba de cabeza un córner de Colombatto pa facer xusticia y poner el 1-1 con inda tola segunda parte per delantre.
El tantu del portugués supunxo una inyección de moral pa los asturianos que nun cesaron en buscar el segundu. La insistencia tuvo'l so premiu y Sebas Moyano, con un golazu, punxo per delantre al so equipu. El Real Oviedo llograba da-y la vuelta al marcador nunu de los campos más complicaos de la categoría anque a falta de 15 minutos pal final l'alcuentru tuvo que detenese. El colexáu, Corderu Vega, paró'l choque por que los sanitarios pudieren atender una indisposición pa plasmu del públicu.
Cola ovación d'A Malata y tola fuerza de los ellí presentes, la persona que sufriera la indisposición abandonaba'l campu n'ambulancia y el partíu volvió a entamar. El colexáu añedió 17 minutos más y yá nel tiempu extra llegó la sentencia de Alemão. El brasileñu arolló a la defensa gallega pa fusilar a la meta local dende fora de la área y desamarrar la llocura del uvieísmu. 1-3 y trés puntos perimportantes que faen suañar a l'afición carbayona.
Con esta resultancia, el conxuntu asturianu suma 34 puntos y acaba col fortín d'A Malata. Agora, y con tiempu abondu pa saborguiar y esfrutar de la victoria, el Real Uviéu va apostar dos choques en casa frente a Leganés, primero, y Eldense, darréu.
