En busca de la tercera consecutiva. Asina llegaba'l Real Oviedo a la xornada númberu 25 de LaLiga Hypermotion na que los azules víen les cares col CD Eldense nel Carlos Tartiere. El conxuntu uvieín quería sumar un nuevu trunfu énte la so xente y pallo Luis Carrión allinió un once formáu por: Leo Román, Viti, Lueno, Dani Calvo, Abel Bretones, Colombatto, Jimmy, Sebas Moyano, Masca, Dubasin y Borja Bastón.
Empezó'l partíu con bastante igualdá ente dambos combinaos onde Sebas Moyano protagonizaría la primer acción clara del alcuentru. El so disparu colóse enriba anque minutos más tarde Abel Bretones a puntu tuvo de facer el primeru. Una bona internada del llateral terminaba con un bon disparu dende'l perfil esquierdu anque'l so remate nun foi ente los trés palos.
El Eldense pudo quedase con un xugador menos tres una entrada bien duru sobre Dubasin anque l'árbitru decidió castigar namáI con tarxeta mariella. Tres esa xugada polémica llegaría'l primer tantu del CD Eldense. Chapela remató una bona acción combinativa y punxo el primeru del alcuentru. 0-1 y tocaba remontar.
Tres la continuación, Luis Carrión metió trés cambeos y dio entrada a David Costas, Cazorla y Paulino de la Fuente en llugar de Viti, Masca y Jimmy. Los uvieinos metieron una marcha más colos cambeos y atacaron mientres tola segunda parte en busca del tantu del empate. Tres delles ocasiones de peligru, Borja foi baltáu na área y el colexáu, tres revisión del VAR, decidió señalar penalti y espulsar a Dumic. El capitán nun falló dende los once metros y punxo el 1-1 nel lluminosu.
Alemão y Lucas tamién salieron dende'l banquín y el Carlos Tartiere nun dexó d'afalar a los suyos pa llograr la victoria. Yá na recta final del alcuentru, Santi Cazorla mandó'l balón al travesal tres una falta dende la frontera qu'a puntu tuvo de ser un auténticu golazu. Magar los intentos finales, el choque remató col 1-1 que dexa a el carbayones con 38 puntos antes de midise la próxima xornada al Real Sporting de Xixón nel derbi asturianu.
