El Real Oviedo viaxaba hasta tierres castellonenses para encarar el postreru partíu del añu 2023 col claru oxetivu de volver sumar un nuevu trunfu que lu averara a los puestos de play off. Primero que empezara'l choque, el Villarreal quixo rindir homenaxe a la figura de Santi Cazorla, na vuelta del centrocampista a unu de los clubes más importantes de la so trayectoria profesional.
Nesta ocasión, los azules víen les cares col Villarreal B na xornada númberu 21 de LaLiga Hypermotion y para esti alcuentru'l técnicu catalán, Luis Carrión, decidió alliniar un once formáu por: Leo Román, Abel Bretones, Oier Luengo, Dani Calvo, Viti, Jimmy, Colombatto, Seoane, Sebas Moyano, Masca y Borja Bastón..
Salió meyor al alcuentru'l combináu local que nel minutu 9, tres una bona acción, yá se ponía per delantre nel marcador. Álex Forés superaba a Leo Román nel mano a mano para poner el 1-0 nel lluminosu cuando apenes llegáramos a los primeres 10 minutos d'alcuentru. El filial mariellu taba con una marcha más anque col pasu de los minutos el Real Oviedo empezó a ganar importancia.
Masca, nel 23', tuvo la primera con un remate de cabeza que se coló por pocu. Los uvieinos nun cesaron en buscar el tantu del empate y Seoane en cantu del descansu protagonizó l'acción más clara del primer periodu. El mediocampista aprovechó un mal despexe de la zaga local para rematar a puerta vacía pero'l so disparu colóse percima del llargueru. A lo último, Masca, nel 45', nun llogró contactar bien col balón tres un bon centru de Borja dende la derecha anque l'acción taba invalidada per fora de xuegu. Magar los intentos carbayonos, el combináu de la capital del Principáu coló al descansu por detrás nel marcador.
Tres el pasu por vestuarios, Masca tendría la igualada pero'l portugués nun llogró direccionar una bon unviada de Bretones dende la esquierda. El remate del delanteru, de primeres, foise raspiando'l palu de la meta defendida por Iker Álvarez. El Villarreal B tamién tendría dos bones ocasiones darréu pero un Leo Román imperial alloñaba'l peligru y caltenía a los suyos nel partíu. El pasu de los minutos fixo que Carrión moviera'l banquín y Sesé y Alemão entraron al campu en llugar de Viti y Jimmy.
Álex Cardero y Pomares tamién ingresaron al terrén de xuegu para tratar de camudar les coses y sería precisamente'l canteranu'l que nel descuentu, con un disparu dende la frontera de la área, punxera'l 1-1. Golazu del mozu centrocampista para rescatar un puntu de La Cerámica cuando tou paecía perdíu. La última acción del partíu dexó la mala noticia de la espulsión de Dani Calvo por doble mariella que condiciona a Luis Carrión de cara a la vuelta de LaLiga Hypermotion nel añu 2024.
Tres esti choque, el conxuntu azul cierra la primer vuelta de la temporada con 30 puntos y na décima posición de la tabla. Agora, tiempu de folgar y garrar fuerces para encarar de la meyor forma posible la vuelta de la competición el próximu 13 de xineru énte la SD Amorebieta.
