Duelu d'altor nel Ciutat de València. El Real Oviedo midióse nesta xornada númberu 8 de LaLiga Hypermotion al Levante UD nun partíu que se prevía complicáu pero al que los azules llegaben nun gran estáu de forma en ganando a la SD Eibar la pasada fin de selmana. Para esta ocasión, Javi Calleja optó por repitir en mesmu que ganó nel Carlos Tartiere y formó d'entamu con: Aarón Escandell, Rahim, Dani Calvo, David Costas, Luengo, Colombatto, Seoane, Cazorla, Sebas, Chaira y Alemão.

 

Los primeros minutos del choque trescurrieron con superioridá local que dende l'entamu trató d'imponer el so ritmu y estilu de xuegu. Nel 16', Charia protagonizó'l primer acercamientu uvieín sobro la meta rival pero'l so disparu, dende fora de la área, foise raspiando'l palu de la portería defendida por Andrés Fernández. Díez minutos más tarde, Alemão la tenía de cabeza a centru de Ilyas pero'l so testerazu colábase fora y la xugada yera invalidada per fora de xuegu. 

 

Los de Calero, que fallaron incomprensiblemente un pase de la muerte al entamu, siguíen tratando d'acesmar la meta de Aarón Escandell anque'l marcador siguía ensin movese. Yá nel 36', y otra vegada a la contra, Sebas probaba fortuna dende fora de la área. Sicasí, una bona espurrida d'Andrés evitaba'l 0-1. Descansu y tou por decidir pa la segunda metá.

 

Tres la continuación, Brugué metió'l mieu nel cuerpu de too l'uvieísmu con un taconazu, a centru de Morales, que se machó raspiando'l poste derechu de la meta defendida por Aarón Escandell. Nel 66´, Paulino de la Fuente y Sibo entraron al terrén de xuegu - Pomares yá lo fixera al descansu en llugar de Rahim, coles mires de que l'equipu asitiárase y empezara a cafiar la meta levantinista. 

 

El Levante UD, al traviés de Pablo Martínez, volvió tener una gran acción de peligru pero otra vegada Escandell, con una gran mano embaxo, qu 'encargóse de caltener la portería azul a cero. Los postreros 15 minutos de partíu arrincaron con un tiru de Ilyas Chaira que s'envelenó y acabó en córner. Los uvieinos trataben de buscar el gol al traviés de les acciones a balón paráu pero nun hubo manera. Hassan y Masca agotaben los cambeos pa los de Javi Calleja que se colaron del Ciutat de València con un puntu meritoriu y que fai que'l Real Oviedo se coloque en décima posición con dolce puntos.