ROV / UVIEDISTES / Proud of you

Proud of you

El sentimientu Proud of you (arguyosos de vós) nació en payares del 2012, nel procesu d’ampliación de capital onde’l Real Uviéu taba xugando’l futuru.

El club encarábase con una causa de disolución inminente y facíen falta polo menos dos millones d’euros pa salvalu. La movilización ensin precedentes de los aficionaos azules, encabezaos polos canteranos uviedistes más internacionales y periodistes de referencia que dieron a conocer la nuestra historia al traviés de les redes sociales, convirtióse nun movimientu global. Mil y milenta persones contaxáronse del sentimientu uviedista, comprando acciones de la entidá dende cualquier requexu del mundu. El fenómenu viral algamó 80 países y foi noticia nos medios de comunicación principales del planeta. Tolos continentes supieron de la nuestra existencia y el movimientu desembocó nuna concepción nueva de la entidá. El mundu quixo escuchar la nuestra historia. Y d’esta manera, el Real Uviéu convertíase, de la nueche a la mañana, nun club con más de 30 000 accionistes y aficionaos repartíos per tol mundu.

El Real Uviéu foi quién a superar ún de los momentos más críticos de la so historia y, en respuesta a esa aportación espontánea llegada de más de 80 países, los aficionaos uviedistes acuñaron l’eslogan Proud of you p’agradecer, a los recién llegaos, el so apoyu incondicional a un equipu al que malpenes conocíen, pero qu’aína supieron poner en mapa. L’uviedismu agradecía non solo l’apoyu económicu, que resultare fundamental pa la salvación de la entidá, sinón el fechu de qu’esos miles de persones entendieren qu’esti ye un club diferente, con una historia que cuntar y, sobre manera, con un alma pola que lluchar.

Desque acabó’l procesu d’ampliación de capital, y cola entrada d’un accionista de referencia como’l Grupo Carso, l’uviedismu nun quixo dexar pasar la que yá se convirtiere nuna historia irrepetible y trabayó pa estrechar llazos con los accionistes estranxeros nuevos.

N’abril del 2013 celebróse n’Uviéu la primer edición del Supporter’s Day, a la que foron unos 150 accionistes llegaos dende delles partes del mundu y del territoriu nacional. Les xornaes, qu’incluyeron coloquios, un tornéu de fútbol ente aficionaos disputáu nes instalaciones del club, una visita guiada a la ciudá y una fiesta previa al partíu de lliga, foron un éxitu tanto d’organización como de participación y valieron pa que los uviedistes de tol mundu confraternizaren y s’aunieren alredor del so equipu. Amás, nos prolegómenos del partíu, bautizóse la puerta 19 del Estadiu Carlos Tartiere col nome Proud of you como un reconocimientu permanente a los accionistes nuevos. Per ella éntrase a una zona del estadiu onde quedó inmortalizada la historia del nacimientu d’esti sentimientu nuevu y na que se cunta lo qu’asocedió en payares del añu 2012. Dende entós, un requeñu del nuestru estadiu ta dedicada a toles persones que d’una manera o otra ayudaron a escribir una de les histories más guapes enxamás cuntaes nel mundu del fútbol. Y a facela realidá: Proud of you.

El Real Uviéu sigue trabayando con una dedicación especial pa caltener vivu esi sentimientu que sigue llamando a cientos d’accionistes estranxeros, que nos visiten y conocen cada añu, y que nun entienden de nacionalidá nin idioma pa siguir siendo fieles a los nuestros colores. Y nel so afán decidíu de caltener y reforzar el contactu colos sos aficionaos de tol mundu, el Real Uviéu dispón de la cuenta de corréu electrónicu areasocial@realoviedo.es, creada p’atender toles demandes de los miles d’uviedistes repartíos per bona parte del planeta y, sobre manera, d’aquellos que pola distancia xeográfica o la barrera idiomática disponen de menos accesu a la información cotidiana relativa al club.

El calter universal del nuestru club ye una de les señes principales d’identidá y queremos salvaguardala como merez, ufiertando l’atención necesaria a tolos uviedistes que siguen al nuestru equipu dende los puntos más diversos del globu terraqueu y con un ciñu especial a tolos accionistes qu’ayudaron apasionadamente a salvar el sentimientu del Real Uviéu cuando’l club más lo precisaba.

De la mesma manera qu’entós glayemos Proud of you, güei siguimos sintiéndonos mui arguyosos de vós y queremos curiavos como merecéis, teniéndovos al día de les nuestres novedaes, respondiendo a les vuestres duldes, facilitándovos tolo posible que vengáis a venos, que nos acompañéis nel nuestru estadiu cuando vos seya posible y, en definitiva, que compartamos esti sentimientu tan especial, esi sentimientu que namás s’entiende si se ta dientro.

¿Quies venir a un partíu nel Carlos Tartiere?

Si quies venir a un partíu del Real Uviéu, avísanos y ayudámoste a entamar el to  viaxe.

Ufiertámoste billete d’avión, hotel y una visita privada al estadiu Carlos Tartiere y al muséu del club.

Vas poder ver de cerca los xugadores del Real Uviéu.

Si tas interesáu na esperiencia Real Uviéu, escríbinos a supporters@realoviedo.es