Llegaba'l Real Oviedo a La Romareda cola mesma necesidá de ganar que'l conxuntu maño, nuna tarde d'intensu calor y dellos cambeos nel once titular oviedista vistiendo "Sacavera".

Tarín al llateral derechu, pareya de centrales con Costas y Luengo, y Pomares repitiendo nel llateral esquierdu. Centru del campu para Luismi y Montoro con Viti y Bretones en bandes, y Javi Mier para conectar con Bastón. Nun pasaren nin tres minutos del pitíu inicial cuando'l Zaragoza anotaba l'unu a cero. Iván adelantraba al conxuntu maño y noquiaba a los oviedistas nel arranque del alcuentru. Col pasu de los minutos foi tomando posu'l Real Oviedo, qu'empezó a averase con peligru. Una bien clara que Borja Bastón picó esviada percima de Cristian Álvarez. Un gol de Javi Mier anuláu per fora de xuegu de Bretones, y otra opción clara de Bastón, pero ensin premiu antes del descansu, col unu a cero nel marcador.

Arrincó la segunda parte con cambéu en defensa. Lucas sustituyó a Costas, y Tarín pasó al centru de la defensa. Llegó entós l'empate, obra de Montoro cabeciando una peñada previa de Bastón. Un fuerte golpe dexó fora a Javi Mier, sustituído por Hugo Rama. Goció'l conxuntu oviedista d'un par d'ocasiones más; un balón de Lucas que-y llegó a Bastón al corazón de la área pero nun atinó nel control, y otra  afecha al palu que se coló fora por pocu. Enfrescaron Obeng, Sangalli y Jimmy. Hubo más opciones oviedistas, pero tamién dalguna intervención salvadora de Tomeu Nadal. Finalmente, un puntu más pal Real Oviedo que nun va tener tregua y mañana va empezar a preparar el partíu del miércoles énte l'Huesca nel Tartiere.