El Real Oviedo tornó a la senda de la victoria tres imponese por 1-0 al Valencia nel Carlos Tartiere, nun partíu bien seriu y completu de los azules, que controlaron el partíu de principiu a fin y xeneraron les ocasiones más clares.

Dende los primeros minutos, el conxuntu oviedista amosó personalidá y solidez, dominando'l ritmu del partíu y minimizando les opciones del rival. Thiago Fernández tuvo la primer con un gran remate dende la frontal que se marchó por bien poco. 

Bien plantáu sobre'l terrén de xuegu, l'Oviedo foi creciendo col pasu de los minutos hasta alcontrar premiu enantes del descansu. El únicu gol del partíu llegó na primer metá tres una aición d'estratexa. El corner sacóse en cortu y Thiago Fernández, tres superar al so marcador, alzó la cabeza y punxo un balón atrás perfechu pa la posición de David Costas, que nun perdonó y unvió'l balón al fondu de la rede pa adelantar a los carbayones.

Con ventaya nel marcador, el Real Oviedo caltuvo'l so plan de partíu y siguió amosándose sólidu y concentráu en toles fases del xuegu. Los azules marcharon al descansu col 1-0 y cola sensación d'haber sido superiores. Chaira, nel 60´, y Colombatto y Hassan, posteriormente, entraron al terrén de xuegu pa facer más dañu y buscar un gol que finó por llegar.

Reina firmó un auténticu golazu dende fuera del área en otra aición ensayada de saque esquina. Sicasí, la xugada foi anulada por fuera de xuegu posicional y el 1-0 caltuvo nel marcador.

El Valencia apenas alcontró espacios ante un Oviedo bien ordenáu y comprometíu, que supo xestionar la so ventaya hasta'l pitíu final pa sumar tres puntos d'enorme importancia. Con esta victoria, el conxuntu azul vuelve a ganar y recorta puntos colos puestos de descensu, reforzando amás les bones sensaciones amosaes sobre'l terrén de xuegu.

Agora, el conxuntu azul yá piensa nel so próximu compromisu, otra auténtica final na llucha polos oxetivos de la temporada, que-y llevará a enfrentase al Levante en tierres valencianes.