Penúltima xornada del campeonatu y la fe que sigue intacta. El Real Oviedo viaxaba a Tenerife col optimismu por sumar de trés y llegar al postreru partíu cola opción de llograr l'ascensu directu. Tres la victoria énte'l Real Zaragoza, el técnicu, Veljko Paunovic modificó llixeramente l'once inicial y salió con Aarón Escandell en portería, Costas, Calvo, Nacho, Rahim en defensa, Colombatto, Sibo, Cardero, Portillo y Hassan nel centru del campu y con Alemão como referencia.

 

Los primeros minutos fueron pa los locales que gociaron de les meyores ocasiones de gol. Un tanto bien anuláu al entamu y un testerazu de Luismi Cruz al poste fixeron que l'Oviedo espertara y adulces empezara a entrar nel alcuentru. Tres esi primer aceleríu del combináu tinerfeñu, Alemão la tuvo pa los nuesos pero'l "9" nun llegó por bien poco a un centru dende esquierda. 

 

Dempués de la protocolaria pausa d'hidratación nel ecuador de la primer metá, el duelu entró nuna fase d'igualdá y les ocasiones de gol sumieron. Descansu. Tres la continuación, y yá pasáu'l minutu 60, el Real Oviedo realizó les so primeres trés sustituciones. Cazorla, Paraschiv y Luengo entraron al campu en llugar de Cardero, Hassan y Portillo. Darréu Sibo vio cartulina mariella y va perdese la última xornada n'atropando cinco.

 

Nel 74', Nacho Vidal aprovechó un erru defensivu de los locales y batió por altu a la meta del CD Tenerife pa poner el 1-0. Llocura total de los movíos al Heliodoro Rodríguez López que víen como'l suañu del ascensu siguía vivu. Los de Paunovic supieron aguantar la ventaya y lleváronse trés puntos que faen que l'Oviedo llegue a la última xornada con opciones de subir directos. Les cuentes son clares. Primero ganar al Cádiz y depués esperar a qu'el RC Deportivu de la Coruña gane al Elche CF.