El Real Oviedo quedó esaniciáu esta tarde na so primer participación de la temporada en Copa del Rei, nel campu del Andratx.

Empezó metíu'l conxuntu oviedista y vertical, y adelantróse Sangalli nel minutu dos de partíu con un tanto anuláu per fora de xuegu inesistente. Lucas taba adelantráu, pero ensin intervenir na xugada, y l'estremu vascu en posición llegal. El gol nun subió al marcador. Fuéronse metiendo los locales nel partíu, y l'equipu de Ziganda perdía presencia n'área, hasta encaxar el gol. En xugada a balón paráu, anotaba'l conxuntu balear l'unu a cero. Poco dempués llegaba'l segundu, tres un mal estene de la zaga oviedista, el centru terminaba nun remate de cabeza del Andratx qu'anotaba'l dos a cero. Respondió Jirka, nun gran pase al espaciu de Yayo, qu'en controlando en carrera batía cola derecha a la meta local poniendo'l dos a unu y averando distancies nel marcador.

Movió banquín Ziganda nel descansu, dando entrada a Obeng en llugar de Yayo. Dende l'empiezu de la segunda metá foi a pol empate'l Real Oviedo, que lo llograba nun balón paráu con remate dÁrribas, nel que'l balón superaba per completu la llínea de gol, pero tampoco subía al marcador. Dominador absolutu de la segunda metá, -y dió entrada Ziganda primero a Pombo y Borja Sánchez, y dempués a Jimmy y Pierre, escosando los cambeos disponibles. Entornáu'l conjuto oviedista n'ataque, nun llogró anotar l'empate, quedando esaniciáu de la Copa del Rei