El NMR Carlos Tartiere acoyó esta tarde la tercer cita de pretemporada pa los de Ziganda, segunda como locales nel feudu oviedista, qu'enfrentó al conxuntu carbayón contra'l Athletic Club, nel que Edgar, Mujica y Cedric debutaron colos oviedistes.

Femenías, Grippo, Arribas, Edgar, Rodrigo, Juanjo Nieto, Obeng, Viti, Borja, Tejera y Mossa fueron los escoyíos pol técnicu navarru pa formar l'once d'entamu énte los bilbainos. Los azules, cola mesma tónica que nos dos últimos partíos, saltaron sobre'l verde del feudu oviedista dexando bien bones sensaciones tanto n'ataque como en defensa, con presiones altes y lluchando cada balón hasta'l final. Viti, nuna gran acción pela banda, punxo un centru a la área y la defensa visitante encaxó en propia. El Real Oviedo adelantróse nel marcador, pero los de Garitano retayaron distancies a los pocos minutos cola resultancia de 1-1 llegó al descansu.

Tres el pasu por vestuarios, Ziganda dio entrada a Mujica y Jimmy, qu'apurrieron frescura y dinamismu al equipu. L´Athletic púsose por delantre, pero los azules nun se dieron por vencíos y empezaron a buscar la portería bilbaina, con asociaciones y xenerando peligru n'ataque. Un gran centru de Mossa sirvió pa que Obeng, adelantrándose a la defensa, punxera l'empate nel marcador. Bolaño, Cedric, Edu Cortina y Ripoll tamién dispunxeron de minutos, nos que'l Real Oviedo siguió buscando combinaciones y llegaes pa llograr el gol de la victoria.

Nun hai tregua para l'equipu de Ziganda, que mañana visita El Toralín pa encarar el so cuartu, y postreru, compromisu de pretemporada énte la Ponferradina. L'alcuentru va apostar dende les 19:30 hores.