Real Uviéu: Champagne, Johannesson, Carlos Hdez., Javi Hdez., Mossa; Boateng, Edu Cortina, Javi Muñoz; Bárcenas, Saúl y Toché. Tamién xugaron: Alfonso, Lobato, Prendes, Forlín, Lucas, Tejera, Ramón Folch, Borja Sánchez, Sandoval, Asier y Steven.
Gimnástica de Torrelavega: Alex Ruiz; Camus, Docal, Christian, Luis Alberto, Cusi, Vitienes, Palazuelos, Barbero, Cagigas y Fermín. Tamién xugaron: Peón, Fer, Mati, Alberto G., Rozas, Salas, Nacho y Primo.
Goles: 1-0, Toché (min 61). 2-0, Steven (min 74). 2-1, Primo (min 86).
Árbitro: Pelayo Quirós Pérez, comité asturianu. Nun hubo amonestaciones.
El Real Uviéu dio un pasu más en Villaviciosa. Fíxolo nel so cuartu amistosu de pretemporada, énte una Ximnástica de Torrelavega que nun foi quién a facese cola posesión del balón en tol alcuentru, y creando abondes ocasiones como pa llevar una ventaya más amplia en marcador.
Anquela volvió apostar por un once con presencia de dellos de los xugadores del filial que tán participando de forma habitual col primer equipu. Con seriedá en defensa, recuperaciones rápides y repartu de xuegu nel mediu’l prau, el peligru llegaba peles bandes y d’ende fabricó Johannesson la primer ocasión clara del partíu, que tornó’l meta del conxuntu cántabru cuando trescurría’l cuartu d’hora de partíu. La recuperación y el pase foren de Yoel Bárcenas. Tres d’unos minutos de munchu toque pero poca llegada, Javi Muñoz remató, volviendo atopase con Alex Ruiz, y nun llegó pa sentenciar por bien poco otra vez Bárcenas. Toché viose solu énte’l porteru pa sentenciar a placer depués d’un gran pase en fondura de Saúl Berjón, pero l’árbitru invalidó la xugada por un fuera de xuegu inexistente.
Na segunda parte Anquela caltuvo unos cuantos minutos más la cadarma principal del equipu, anque con dalgún refrescu. Llegaron entós dos ocasiones clares. La primera con un balón colgáu de Mossa que remató Carlos Hdez. en segundu palu, dexándolu francu en boca de gol pa qu’anotare Toché, pero llegó mui forciáu a peñar de cabeza. Precisamente’l capitán uviedista diba anotar na siguiente xugada, depués d’un primer remate de Forlín, que, al refugue, crució perfectu Toché pa poner l’un a cero en marcador. Entraron entós seis cambeos dende’l bancu, con presencia de los canteranos restantes convocaos, y Steven firmaba’l segundu depués d’una bona xugada de Tejera. El Real Uviéu siguió volcáu n’ataque, y Borja Sánchez tuvo’l terceru nun remate que s’afrelló en palu y pasióse pela raya de gol ensin atopar rematador. Nos postreros compases del partíu, un fallu puntual en defensa dexó a Primo solu énte Alfonso, pa rebaxar distancies y poner el dos a ún definitivu.
L’equipu va volver entamar los entrenamientos el llunes, en sesión doble, n’El Requexón.
