Depués de xugar el vienres pasáu énte'l Barcelona B y volver a facelo dientro de trés díes en Tenerife, l'actividá nes instalaciones deportives d'El Requexón nun apara pa los de Juan Antonio Anquela, que güei recibieron una visita perespecial.
Trátase de Rick Thornton, accionista estaunidense, qu'actualmente reside n'Australia, qu'aprovechando un viaxe llaboral de la so muyer a España desplazóse hasta Uviéu pa conocer más de cerca la historia y tolo referente al so queríu Real Uviéu.
La historia de Rick col conxuntu azul ye bien peculiar, porque esti fisioterapeuta xubiláu empezó siendo accionista por un regalu d'una amiga canadiense. Con una acción, Rick empezó a interesase pol Real Uviéu, hasta tal puntu que cada mañana entra na nuestra web pa siguir el día a día del club, adquiriendo un paquete d'acciones más ampliu nuna de les últimes ampliaciones.
D'esta manera, el nuestru accionista vio cumplíu ún de los sos suaños, visitando la ciudá, conociendo l'estadiu y tando presente n'entrenamientu de la primer plantiya.
Toa esta acción llevóse alantre col trabayu a comuña de Rick y l'Área Social de la entidá, encabezada por Miguel Sanz, que-y organizó y lu ayudó na so estancia na ciudá. Agora dexámoste'l videu de #RealUvieuTV sobre'l viaxe de Rick a Uviéu. Que te preste.
