Yera la segunda cita en menos de setenta y dos hores, nel mesmu escenariu y énte el mesmu rival. El Real Oviedo creció col pasu de los minutos en La Rosaleda y fixo méritos pa llevase un premiu mayor, que finalmente se quedó n'empate a un gol.
Dos cambeos con respectu al once titular que llogró tables na pasada xornada énte'l Mallorca, cola entrada de Lucas y Marco Sangalli, y el partíu empezaba en La Rosaleda con ocasiones pa dambos conxuntos anque con mayor dominiu local nos primeres compases del partíu. Precisamente nuna xugada a balón paráu, con un gran zapatazu dende la frontera buscando la escuadra, Rahmani anotaba l'unu a cero pa los de Pellicer. El conxuntu oviedista foise faciendo col dominiu y les ocasiones col pasu de los minutos. Lucas probó suerte con un llanzamientu que se coló esviáu, buscaba la escuadra. Rodri tocó forzáu, en carrera, un centru dende la derecha y el balón colóse raspiando'l poste esquierdu. Tamién forzáu, a la media vuelta y demasiao escorado, intentólo Javi Mier con un remate na área que se coló alto. Anotaba Marco Sangalli, al refugue, tres dos remates de Nahuel y Gustavo, pero'l so tantu yera anuláu per fora de xuegu previu. La postrera pa los oviedistas antes del descansu foi un cabecio de Javi Mier que se coló raspiando'l poste.
Empezó la segunda metá siguiendo col guión de la primera, con mayor dominiu oviedista, qu'emburriaba hasta atopar el gol. Foi nuna xugada roblada por Nahuel, que-y ganó la posición a la defensa local, disparó cruciáu y en tocando nun zagueru del Málaga, Rodri defendió la entrada del balón enportería. Yera l'empate a unu. Tuvo'l Real Oviedo dalguna opción más, a la contra, pero ensin aciertu. Movió banquín Ziganda, dando entrada a Obeng y Borja Valle por Blanco Leschuk y Rodrigo. El plasmu lo dió una xugada que primeramente se decretaba como penalty en contra para l'equipu oviedista, pero que tres revisión VAR, anulábase correctamente la pena máxima. Y poco dempués, nes files del Málaga, Escassi fué espulsáu a falta d'ocho minutos pal noventa, por doble mariella. L'unu a dos túvolu Obeng nes sos botes, nun centru de Juanjo Nieto que tocó lo xusto l'ariete oviedista na área, pero que Dani Barrio despexó a córner. Tuvo dellos saques d'esquina, con remates que fueron anulaos per fora de xuegu. Borja Valle probó suerte con un disparu rasu dende la frontera, que se coló esviáu.
Munches ocasiones, pocu aciertu y pocu premiu pa un Real Oviedo que mereció llevase mayor botín de La Rosaleda, pero que nun tuvo'l día de cara a portería.
