La segunda fecha nel calendariu de LaLiga SmartBank, primer como visitantes pa los de Ziganda, llevó al Real Oviedo al Estadiu de los Juegos del Mediterráneo, onde se midió al Almería, con derrota azul a la fin de los noventa minutos.
Con un once similar al de la pasada fin de selmana ente el CD Lugo, cola única novedá de Sangalli nel mediocentro, saltaron los asturianos al verde del feudu andaluz, onde a los pocos minutos de xuegu fueron sosprendíos, por cuenta de un erru azul, viéndose per debaxo nel marcador. Col 1-0 nel lluminosu, los de la capital del Principáu nun s'achicaron y empezaron a buscar la portería almeriense, con bones transiciones y peligru peles bandes. A balón paráu llegó'l tantu oviedista, con una asistencia de tacón de Costas que Samu Obeng nun perdonó dientro de la área pequena. L'empate azul fixo que'l partíu entrara nuna fase en que los dos equipos dispunxeren d'ocasiones p'aumentar la guerra, pero les defenses tuvieron atinaes pa evitar que dambos conxuntos pudieren llograr el tantu. El Almería anotaría na meta de Femenías, pero l'árbitru anuló'l gol por falta nel remate de Sadik. La primer parte acabó con un Almería con más posesión, que consiguió algamar la portería de Femenías al filu del descansu, poniendo'l 2-1 nel lluminosu.
La segunda metá, ensin cambeos al entamu, empezó con un Real Oviedo que salió a buscar la posesión del xuegu pa crear peligru sobro l'arcu almeriense, colos homes d'ataque primiendo a los locales. Intentólo ´l conxuntu de la capital del Principáu ente un Almería que nun vencía en defensa. Ziganda dio entrada a Borja Bastón, Jony Montiel y Matheus, cola clara intención de meter chispa n'ataque par buscar l'empate. Darréu entraron sobro'l terrén de xuegu Jirka y Alex Cardero que trataron de mete-y una marcha más al xuegu del Real Uviéu pa buscar l'empate. El conxuntu azul nun cesó nel so intentu de buscar la portería almeriense,
pero nun dispunxo del aciertu necesariu pa consiguir l'empate.
Los azules vienen de vacíu de Almería y van buscar siguir trabayando esta selmana pa encarar el so próximu compromisu en LaLiga SmartBank énte'l Tenerife. El choque apostaráse'l sábadu, dende les 19:30 hores, nel Carlos Tartiere.
