Con motivu del centenariu de la inauguración del estadiu de Teatinos y col fin de dar a conocer cómo yera esa instalación deportiva, publicamos el siguiente vídeu, realizáu especialmente para la ocasión pol estudiosu de la hestoria oviedista Marcos García Álvarez y que recrea'l campu de fútbol onde'l Real Oviedo xugó los sos primeros partíos oficiales.
Ya que nun esistíen planos del estadiu nin imaxes onde pudiera vese completu, el trabayu d'investigación realizáu por Marcos García para percanciar la información necesaria para la realización del vídeu foi tremendamente llaboriosu y enllargóse durante más d'un añu.
El 31 d'agostu de 1919, el Club Deportivu de Oviedo, propietariu del estadiu de Teatinos, daba en la so inauguración con una serie d'acontecimientos deportivos, tantu d'atletismu como de fútbol.
Con motivu del centenariu de la inauguración del estadiu de Teatinos, el club encargó a Correos un sellu especial, de cursu llegal, que va tar a disposición de tolos aficionaos nes próximes feches.
Coles mesmes, para conmemorar el centenariu de dicha efeméride, el Real Oviedo va inaugurar esti sábadu un monolitu rememorativo nel llugar qu'ocupaba l'estadiu de Teatinos.
Cuando'l Real Club Deportiv¡o de Oviedo y el Real Stadium Club Ovetense fusionáronse en 1926 para fundar el Real Oviedo, l'estadiu de Teatinos pasó a ser el feudu oficial del nuevu club. En 1932 el Real Oviedo dexó l'estadiu de Teatinos y empezó a xugar nel Stadium de Buenavista. L'estadiu de Teatinos esistió hasta mediaos de los años 40 del pasáu sieglu.
AST
