La sala de prensa del Carlos Tartiere acoyó la presentación oficial de Joselu como xugador nuevu del Real Uviéu.
L'andaluz tuvo acompañáu pol presidente, Jorge Menéndez Vallina, que-y dio la bienvenida, reconociendo que “había gana de que viniere. Agradece-y la so gana y el so compromisu. Ye un xugador rápidu, trabayador y con gol, que nos va ayudar muncho. Ye importante la palabra que nos dio, tamos encantaos”.
Pela so parte, Joselu empezó “agradeciendo a Ángel Martín pola so insistencia y el so ciñu. Ufiertáronme un proyectu ilusionante, convenciéronme. Yera onde quería xugar y equí toi. Sentí'l ciñu en tou momentu, y que yera'l club que más me quería. Esi ciñu foi mutuu. Ye onde quería xugar”.
Sobre'l so fichaxe, el delanteru comenta que “foi'l culebrón del branu. Foi difícil la negociación, pero yá toi equí. Tengo gana d'empezar y ayudar al equipu”.
Tocante a si se marca una cifra de goles, Joselu destaca que “nun avezo a marcarme cifres goliadores. Quiero que veáis la meyor versión de Joselu”.
Sobre los sos primeros contactos col vestuariu, l'andaluz afirma que “falé con Carlos, Saúl y Christian, llamábenme pa convenceme. Sentí'l ciñu del vestuariu. Facilitáronme les coses. Mañana falaremos más”.
Entrugáu sobre si pue ser de la partida'l domingu énte l'Extremadura, l'ariete señala que “físicamente toi bien, pero tien que ser el míster el que decida”.
A la fin, sobre la competencia, a Joselu paez-y que “va ser guapa y sana. Ye una temporada llarga y hai tiempu pa too. Tenemos que sumar al equipu y quién me diere que podamos poner lo máximo”, sentenció l'andaluz.
AST
