Joe Aboumrad, de Grupo Carso, Fundación Telmex y director de Clarosports, llegaba ayeri tarde a la ciudá d’Uviéu pa ver esti sábadu en directo’l partíu que va midir al Real Uviéu cola UD Almería nel Carlos Tartiere. Nesta entrevista, Aboumrad repasa l’actualidá del equipu, les sos sensaciones nesta visita nueva, valora’l trabayu lleváu a cabu na xestión de Grupo Carso nestos seis años y cúntanos cuálos son los siguientes pasos d’un proyectu que nun aparó de medrar.
¿Qué sensación tuvo na so vuelta a Uviéu?
Toi percontentu, vuelve a sentise la formiguina de cuándo tuviemos equí col ascensu. Mui bones alcordances.
Atopóse una ciudá asemeyada... ¿y un club bien distintu?
Bien distintu, la verdá bien contentu con tolo qu’avancemos. N’El Requexón, cómo tán los campos, el vistidor... toles meyores que nun se ven fuera pero l’equipu ta medrando interno. Eso nel futuru va reflexándose nos resultaos na cancha. Hai coses por facer, ye un procesu, pero vamos nel camín correctu.
Esta mañana saludó a la plantiya. ¿Qué tal la charla col técnicu y los xugadores?
El grupu ta perbién. Nótase que tán comprometíos. Sabemos l’oxetivu que tenemos, queremos xubir. El grupu sábelo, el míster sábelo. Hai que ser precavíos, saber que nun se va ganar namás por ser el Real Uviéu. La conversación foi pa tresmiti-yos que sepan que tienen tol nuestru sofitu, en nome d’Arturo y del Grupu, que tamos pa sofitalos y pa lo que precisen. Quién me diere que se dea lo que queremos.
¿Contentu d’atopase a un futbolista mexicanu na plantiya?
Sí, l’acentu ye distintu. L’empiezu foi difícil, paezme que se ta afayando bien. Lo importante ye qu’apurra como un xugador más al equipu.
Amás de lo deportivo, ye importante la valoración d’una xestión qu’en seis años acabó colos 15 millones d’euros de deuda qu’axuntaba’l club. ¿Cómo valora’l trabayu lleváu a cabu hasta’l momentu?
Ye de les coses más importantes que se llograron. Eso muestra lo que somos como Real Uviéu. El respaldu qu’hai, el compromisu que tenemos toos. Agora camuda enforma la xestión, puen facese otru tipu de planes al plazu llargu. Enantes nun se podía con una deuda tan importante. L’esfuerzu que fiximos toos, l’afición, el Grupu, tolos socios del Real Uviéu, fai que podamos planiar el futuru. Ye perimportante, porque quier dicir que vienen coses meyores.
¿Síguese cola mesma pasión al Real Uviéu dende México?
Ye complicao porque non siempre podemos ver el partíu en directo, dacuando siguímoslo per redes sociales. Vivímoslo mui intenso, les peñes vívenlo mui intenso, siempre s’axunten a velo nun par de sitios en México. Ye mui guapo.
¿Cuál ye’l siguiente pasu agora?
Que toos xuban... (rises). L’escenariu ideal diba ser que los dos equipos entren a la parte d’ascensu en mayu del añu que vien, quién me diere que nos sentemos llueu pa ver cuálos son esos planes, pero de momentu lo que sigue ye siguir xestionando bien l’equipu. Nun cometer errores no alministrativo, siguir medrando col filial, les fuercies básiques, la medría de los xugadores... eses figures que puedan dexar nel futuru tener un equipu muncho más fuerte. Na parte alministrativa nun cometer errores, hai que ser bien cautelosos, tomar decisiones responsables col equipu y l’afición. Vienen cambeos importantes que se dieron nel mundu del fútbol colos derechos de televisión, LaLiga... Hai que lo xestionar bien y paezme que tamos nel sitiu afayadizu pa poder algamar toos esos oxetivos, qu’a la fin l’oxetivu futbolísticu y los resultaos son los que manden. Pa eso hai que tener una situación financiera sólida, una alministración sólida, un equipu de trabayu en tolos aspectos sólidu. Ye bien importante la comunicación cola afición, colos equipos... Toes eses partes que tamos enllenando adulces foron bien afortunaes.
¿Un mensaxe pa los uviedistes?
Que nos vemos mañana nel partíu. Préstame muncho volver tar equí, encantaríanos venir muncho más pero tenemos otros munchos compromisos. Tamos de corazón con ellos, comprometíos cola afición. Sabemos lo difícil que ye tar toles fines de selmana, de locales y visitantes sofitando, agradecémos-ylo muncho. Que ganemos. Vémonos llueu.
