L'últimu alcuentru del 2021 para'l Real Oviedo, primero de la segunda vuelta para los azules, enfrentó nel Carlos Tartiere a los de la capital del Principáu cola SD Ponferradina, nun choque qu'acabó cola resultancia de 2-0, en favor de los intereses oviedistas.
Cerrar l'añu sumando de tres foi cola premisa que saltaron los azules sobro'l terrén de xuegu oviedista, con un once nel que les principales novedaes fueron Javi Moreno y Javi Cueto, que suplieron les distintes ausencies producíes pol Covid-19.
Femenías; Javi Moreno, Dani Calvo, Bolaño, Pierre; Jirka, Jimmy, Luismi, Borja Sánchez; Viti y Javi Cueto entraron de mano nun primer tiempu qu'empezó cola espulsión de Edu Espiau, tres revisión del VAR, por una pisotada sobro Jimmy en campu oviedista. Los primeres cuarenta y cinco minutos decantáronse del llau azul, con un conxuntu de la capital del Principáu bien ordenáu defensivamente y llevando el control de xuegu pa buscar les acciones de peligru sobro la meta visitante. La más clara del primer tiempu foi una acción de Jirka, con una volea, que se coló pel llateral del arcu bercianu.
Tres el pasu por vestuarios, onde Sangalli, Obeng y Pombo entraron al terrén de xuegu, la segunda metá foi d'entamu a fin oviedista, con bien bonos momentos de los de la capital del Principáu. Borja Sánchez, tres una bona combinación con Obeng punxo'l primeru con una sublime vaselina. Tres esto l'equipu de Ziganda siguió buscando'l segundu, que llegó dende los once metros. Pombo nun falló y punxo un nuevu tantu nel marcador. La Ponferradina quedóse con unu menos tres la espulsión d'unu de los suyos por disconformidaes col colexáu. Sangalli tuvo otra clara p'anotar el terceru, nun partíu qu'acabó coles entraes al campu de Costas y Joni Montiel.
Victoria d'equipu pa cerrar el 2021, con Real Oviedo que dexó bien bones sensaciones y ocupando los puestos de privilexu de la tabla. Los de la capital del Principáu van abrir el 2022 ente'l SD Eibar nel Carlos Tartiere, el llunes 10 de xineru dende les 21:00 hores.
