El Real Uviéu marchó de vacío de Los Cármenes. A pesar de qu’ameritó más, la realidá ye qu’al marcador namás xubió un gol, y foi del líder de la categoría, al que los uviedistes fixeron frente hasta pasáu’l minutu ochenta de partíu.
Col retoque obligáu en defensa pola ausencia del sancionáu Javi Hernández, y la vuelta de Christian Fernández, Anquela repitió once y funcionó-y. L’equipu empezó metíu nel partíu y tuvo los primeros averamientos namás arrincar l’alcuentru. Probó Johannesson, pero marchó
altu’l xu cola esquierda. Al minutu seis, Ibra sacó un disparu cruciáu que coló raspiando’l poste. Tocaba bien el Real Uviéu, nun concedía, y averábase con criteriu. Les dos siguientes foron de Johannesson. Primero controló y remató n’área, pero atrapó Rui Silva. Na siguiente, el so remate marchó fuera por bien poco, anque llegó forciáu na disputa con un contrariu. Mossa probó dende la frontal, pero volvió atrapar el meta local. Asina se llegó al descansu, con un bon
conxuntu uviedista que nun llogró’l premiu del gol.
Na segunda, el Granada aumentó la intensidá y la posesión de balón, y a pesar de nun tener llegaes clares, el Real Uviéu defendióse con criteriu y solidez. L’equipu de Anquela tuvo delles contres, que nun supo materializar en gol, y la más clara foi de Bárcenas rematando un balón que se diba afrellar en poste. Champagne tuvo qu’intervenir pa salvar un balón que buscaba’l llargueru, y los cambeos dende’l bancu nun-y dieron más mordiente a un Real Uviéu qu’encaxó nuna contra, con gol de Ramos nuna bona finalización.
L’equipu vuelve a Uviéu n’autobús y va volver entamar los entrenamientos el llunes a les 17:00 hores n’El Requexón.
