ROV / Club / Estadios

Estadios

Estadios

 

CAMPU DE TEATINOS

INAUGURÁU EN 1919. AFORU 10.000

 

Teatinos

En 1927, espectación por un Real Uviéu 2 Real Sporting de Xixón 1

 

Los primeros partíos amistosos que xugó l’Uviéu Football Club, fixéronse nel Campu de Vetusta —onde xugaba’l Real Stadium davezu—, porque’l terrén de Teatinos atopábase en plena fase de restauración —la tierra daba pasu a la yerba—.

 

Los díes 19 y 20 de setiembre de 1926, en plena fiesta de San Mateo, el campu remocicáu de Teatinos presentaba una gran entrada (8.414 pesetes de recaudación) pa ver el primer partíu internacional que xugaba’l Real Uviéu Football Club. L’alcuentru diba rematar col trunfu uviedín, frente al Athlétic de Viena (3-1), con goles de Trucha (2) y Barril.

 

La puxanza de la sociedá nueva disparó la necesidá de llevantar otru llar nuevu.

 

 

ESTADIU DE BUENAVISTA

INAUGURÁU EN 1932. AFORU 15.000 (AMPLIÁU A 20.000)

 

Buenavista

Inauguración de Buenavista: España 2 Yugoslavia 1

 

El 24 d’abril de 1932, l’estadiu, allugáu na zona alta d’Uviéu llamada “Ciudad Jardín”, que garró’l nome de Buenavista, inaugurábase cola presencia de les selecciones d’España y Yugoslavia (2-1). Llamaba l’atención la cubierta de la tribuna principal, una visera de cien metros lliniales que nun presentaba’l sustentu de nenguna columna, la primera d’esta clas n’Europa, obra de Sánchez del Río.

 

Los propietarios yeren los accionistes de la “Sociedad Anónima Stadium”.

 

Cola guerra civil, el Stadium de Buenavista quedaba en ruines y la Sociedá tuvo que solicitar un creitu de la Xunta de Rexones Devastaes. El 15 de setiembre de 1941, el club recibía la comunicación del unviu de 250.000 pesetes, cola mira de recuperar tol esplendor de la tribuna, terrén de xuegu, la torre de marcador y los aseos.

 

El 16 de xunetu de 1952, creábase la llamada “Junta Alta Gremial”, constituyida pa l’adquisición de les acciones de la “Sociedad Anónima Stadium”, con cuenta de que’l propietariu futuru fore l’Escmu. Conceyu d’Uviéu.

 

El 24 d’agostu de 1954, ante’l notariu d’Uviéu Pedro Caicoya de Rato, col protocolu 972, quedaba executada la venta del estadiu de Buenavista al conceyu uviedín. Agora, el club pasaba a ser arrendatariu por una cantidá de 30.000 pesetes anuales. El preciu final de venta foi de 842.901,97 pesetes, de les que 600.000 apurríense nel momentu de la firma.

 

El 17 de xunu de 1958, la Xunta Directiva del Real Uviéu comunica a don Valentín Masip Acevedo, alcalde del Escelentísimu Conceyu d’Uviéu, l’alcuerdu de la Xunta de solicitar que l’estadiu se llame, n’adelantre, “Stadium Municipal Carlos Tartiere”.

 

El plenu estraordinariu de la corporación municipal de 22 de xunetu de 1958 decidía dar conformidá a la solicitú.

 

Siendo presidente del Real Uviéu Enrique Rubio Sañudo, el 4 de xunu de 1969, en partíu amistosu contra’l Real Madrid (0-2), inaugúrase la primer illuminación artificial del Estadiu Carlos Tartiere.

 

El momentu estelar producíase nel minutu 33 de la primer parte —exactamente les 21 hores, 1 minutu y 40 segundos—. Nesi momentu interrumpíase’l partíu pa qu’Enrique Rubio Sañudo, López Valdivieso y Mateu de Ros calcaren los conmutadores d’illuminación.

 

El 21 d’avientu de 1970 axudícase a Hermanos Díaz Carbajal y a CEYD la cubrición de la grada vieya de Xeneral, con plazu d’execución de 72 díes.

 

Na Tribuna de Xeneral, agora cubierta, la illuminación taba puesto en dos torres, mentes que na Tribuna Principal la illuminación taba asitiao a lo llargo de los cien metros de la Tribuna.

 

El xorobu: asina se conocía’l guarismu “5” qu’apaecía en marcador nes goliaes del club azul y que, por culpa del borrón qu’amosaba na parte alta de la curva, yera asina como lu llamaba l’afición uviedista.

 

ESTADIU CARLOS TARTIERE / BUENAVISTA

REINAUGURÁU EN 1982. AFORU 23.500.

Carlos Tartiere

Aspectu del Buenavista remocicáu

 

P’acoyer el Campeonatu del Mundu en 1982, l’estadiu de Buenavista remocícase dafechu, reinaugurándose’l 29 d’abril de 1982 col partíu ente’l Real Uviéu y la selección nacional de Chile (0-0).

 

En 1991 vivió la estrena en competición europea, nel partíu de la Copa de la UEFA ente’l Real Uviéu y el Xénova, que se remató con victoria uviedista por 1-0.

 

En 1998, la normativa impuesta en materia de seguranza en recintos deportivos obligó a suprimir bona parte de les localidaes de pies. L’aforu del estadiu menguó hasta los 16.485 espectadores (13.605 d’asientu y 2.880 de pies).

 

Igual que nos primeros pasos del club, surdía la necesidá d’una casa nueva pal club. El 27 de xineru del 2003 empezó la valtadura, que se completó en dos meses. Na actualidá la so parcela ocúpala’l Palaciu d’Esposiciones y Congresos Ciudad d’Uviéu.

 

ESTADIU CARLOS TARTIERE

INAUGURÁU NEL 2000. AFORU 30.500.

Tartiere nuevu

Carlos Tartiere, llar actual del Real Uviéu

 

El 20 de setiembre del 2000 inaugúrase oficialmente col enfrentamientu ente’l Real Uviéu y el Partizan de Belgrado, partíu qu’acabó cola derrota del equipu azul por 0-2. Pero 3 díes enantes —el 17—, yá se xugare un alcuentru oficial ente’l Real Uviéu y l’U.D. Las Palmas, correspondiente al Campeonatu de Lliga de 1.er división, que’l resultáu final foi 2-2. El primer gol anotólu de penalti’l xugador de Las Palmas Robert Jarni, y el primeru del R. Uviéu, Losada.